QR Bilim jáne ǵylym ministrligi memleketten qarjylandyrylatyn ǵylymi jobalardy irikteitin Ulttyq ǵylymi keńes quramyna birneshe memorgandy qosýdy usyndy, dep habarlaidy "Ult aqparat".
Atap aitqanda, ǵylymi jobalardy qarjylandyrý júiesiniń ashyqtyǵyn qamtamasyz etý úshin Ulttyq ǵylymi keńeske QR Memlekettik qyzmet isteri agenttiginiń, prokýratýra organdarynyń, Esep komitetiniń ókilderin engizý usynyldy.
«Ministrlik ǵylym salasyn granttyq qarjylandyrý júiesine normativtik jáne zańnamalyq ózgerister engizý qajettigimen kelisedi. Atalǵan jumystyń jańa baǵyttaryn ótken jyly ǵylymi qaýymdastyq keńinen talqylap, qoldaý bildirgen edi. Ministrlik QR Prezidenti Ákimshiligi, Esep komiteti, Memlekettik qyzmet isteri jáne sybailas jemqorlyqqa qarsy is-qimyl agenttiginen kelip túsken usynymdardy jinaqtady. Qazirgi ýaqytta normativtik quqyqtyq aktilerge sáikes ózgerister men tolyqtyrýlar ázirlenip jatyr», - delingen QR Bilim jáne ǵylym ministrliginiń baspasóz qyzmeti jibergen habarlamada.
Sonymen birge, Ǵylym komiteti qarjylandyrylatyn jobalar boiynsha Ulttyq ǵylymi keńes ǵalymdary kúmándi sheshimder qabyldaityndyǵy týraly pikirmen kelispeidi.
«Ǵylymi jobalardy qarjylandyrý konkýrsyna qatysýshylar tarapynan múddeler qaishylyǵyn boldyrmaý maqsatynda, ádildik pen táýelsizdikti qamtamasyz etý úshin Ǵylym komitetiniń tóraǵasy mindetin atqarýshy Rahymjan Nurseiitov Ulttyq ǵylymi keńes quramyna QR Memlekettik qyzmet isteri jáne sybailas jemqorlyqqa qarsy is-qimyl agenttigi ókilderin jáne qajet bolsa, QR prokýratýra organdary men Esep komitetin qosýdy usyndy. Ǵylym komiteti sheshimderine ne ministrlik, ne Ǵylym komiteti áser ete almaityn UǴK ǵalymdarynyń qarjylandyrylatyn jobalar boiynsha kúmándi sheshim qabyldady dep sanamaidy», - delingen habarlamada.
Ǵylym komiteti barlyq ǵalymdarǵa óz jobasy boiynsha ǵylymi jumys nátijelerin turaqty túrde qoǵamǵa habarlap otyrýdy usyndy.
Aita keteiik, ótken aptada QR Memlekettik qyzmet isteri agenttigi Sybailas jemqorlyqqa qarsy saiasat departamentiniń direktory Daniiar Sabyrbaev Ulttyq ǵylymi keńesti jemqorlyqqa jol berdi dep synaǵan bolatyn. Onyń aitýynsha, Ulttyq ǵylymi keńesterdiń quramyn jasaqtaýda zań óreskel buzylǵan.
