Qazaqstanda jemqorlardyń túrmeden shartty túrde merziminen buryn bosap shyǵýyna tyiym salynbaq. Bul týraly búgin QR Sybailas jemqorlyqqa qarsy is-qimyl agenttiginiń alqa májilisinde vedomstvo basshysy Alik Shpekbaev aitty, dep habarlaidy QazAqparat.
«Joǵarǵy sottyń sot korpýsyn »tazalaý« máselesindegi belsendiligin eskere otyryp biz birlesken kúsh-jigerimizben femida qyzmetkerlerin áshkereleimiz. Osy jyldyń ózinde beseýi sottaldy. Osyǵan orai, agenttik quqyq qorǵaý organdary qyzmetkerleri men sýdialardyń jemqorlyq úshin jaýapkershiligin kúsheitýge bastamashylyq jasady. Sonymen qatar, aýyr jáne asa aýyr jemqorlyq qylmystar boiynsha shartty túrde merziminen buryn bosatýdy qoldanýǵa shekteý usynyldy», - dedi agenttik tóraǵasy.
A.Shpekbaevtyń aitýynsha, sońǵy úsh jylda keshendi aldyn-alý sharalarynyń nátijesinde sybailas jemqorlyq quqyq buzýshylyqtardyń sany 14 paiyzǵa azaiǵan. Qylmystyń negizgi bóligi – paraqorlyq (850), urlyq (714) jáne bilikti asyra paidalaný (224) faktileri. Jyl basynan beri 1028 tulǵa áshkerlendi, onyń 23-i respýblikalyq jáne 86-y oblystyq deńgeidegi basshylar.
«Keltirilgen zalaldyń mólsheri edáýir artty – 23,2 mlrd teńge. Bul ótken jylmen salystyrǵanda 1,7 esege kóp. Onyń 94 paiyzy óteldi», - dedi A.Shpekbaev.
