«Nur Otan» partiiasynyń qoldaýymen ótetin aitys «Qazaqstan» telearnasynan kórsetiledi, dep habarlaidy "Ult aqparat".
«Nur Otan» partiiasy, «Qazaqstan» RTRK jáne «Aitys aqyndary men jyrshy, termeshilerdiń halyqaralyq odaǵy» respýblikalyq qoǵamdyq birlestigi ózara yntymaqtastyq týraly memorandýmǵa qol qoidy. Úshjaqty kelisimge sáikes, jyl sońyna deiin «Nur Otan» partiiasynyń qoldaýymen elimizdiń birneshe aimaǵynda ótetin barlyq aitysty «Qazaqstan» telearnasyna aqparattyq súiemeldeýge, iaǵni, sóz alamanyn túsirýge jáne efirge shyǵarýǵa quqyq beredi» dep jazdy partiianyń baspasóz qyzmeti.
Partiia Tóraǵasynyń Birinshi orynbasary Baýyrjan Baibek buǵan deiin óziniń Instagram paraqshasynda «Nur Otan» partiiasynyń doktrinasynda qazaq tilin, mádenieti men salt-dástúrin damytý qoǵamdyq birlestiktiń strategiialyq basym baǵyttarynyń biri ekeni týraly aitqan. Osy oraida, «Nur Otan» daryndy shyǵarmashyl jastardy qoldai otyryp, tól ónerimiz ben ulttyq sport túrlerine udaiy qamqorlyq jasap keledi.
«Táýelsizdiktiń alǵashqy sátinen-aq Elbasy ultymyzdyń uly murasyn, ozyq dástúrleri men mádeni qazynasyn túgendeýge, olardy zamanǵa sai túletip, jańǵyrtýǵa erekshe den qoidy. Halyq óneriniń órkendeýine jaǵdai jasap, daryndy jandarǵa jol ashty. Elbasynyń tikelei bastamasymen iske asyrylǵan «Mádeni mura» jobasynda, «Bolashaqqa baǵdar: rýhani jańǵyrý», «Uly Dalanyń jeti qyry» baǵdarlamalyq maqalalarynda da ulttyq rýhani muramyzdy, qundy jádigerlerimizdi, sporttyq oiyndarymyz ben óner saiystaryn túgendep, damytýǵa erekshe mán berilgen. Ejelden «Bas kespek bolsa da, til kespek joq» dep, han aldynda dat aityp, erkin oiǵa erik bergen, barshaǵa birdei teńdik bergen elmiz. Sondyqtan ultymyzdyń osyndai ozyq ónerin, izgi dástúrlerin jalǵastyrý bizdi kemeldendire túsedi. Osyǵan orai, partiia Tóraǵasynyń bastamasymen qaita jańǵyrýǵa kirisip, ekinshi tynysy ashylyp otyrǵan saiasi uiymymyz aitysqa airyqsha nazar aýdaryp otyr» dep jazdy Baýyrjan Baibek.
Sondai-aq, partiianyń baspasóz qyzmeti, aitys ótetin óńirlerdi jazdy.
12-13 qyrkúiekte Atyraý qalasynda Fariza Ońǵarsynovany eske alýǵa arnalǵan «Jyr juldyzy – Fariza» atty respýblikalyq aitys ótedi. Aitys dese arqasy qozatyn kópshilik aldynda belgili aityskerler óner kórsetedi.
18-19 qyrkúiekte Qaraǵandyda Sáken Seifýllinniń 125 jyldyǵyna arnalǵan halyqaralyq aitys bolady. Bul alamanǵa jergilikti aityskerlerden bólek Qyrǵyzstan, Qytai jáne Mońǵoliia elderinen kelgen sýyryp salma sóz maitalmandary qatysady.
30 qyrkúiekte Almatyda «Otan otbasynan bastalady» atty otbasylyq aitys, al 19 qazanda Nur-Sultan qalasynda «Bereke birligińde, elim» degen atpen taǵy bir alaman ótpek.
Biyl ótetin jyr báigelerin Oral qalasynda 7-8 jeltoqsanda ótetin «Altyn dombyra» respýblikalyq festivali túiindeidi.
