MAKVIN laqapatymen tanymal bolǵan ánshi Nurbolat Bazarbaev úilendi. Uzatý toiynda túsirilgen video Jelide qyzý talqylandy, qoldanýshylar qalyńdyqtyń shash úlgisine tańǵalǵan. Soǵan orai MAKVIN qalyńdyǵy jaily shyndyqty aityp berdi, - dep habarlaidy Tengrinews.kz.
"Qalyńdyǵymnyń esimi - Janiia. Ol ziialy otbasydan shyqqan. Ata-anasy ǵalymdar, himikter. Ózi bishi. Sporttyq bal biinen sport sheberi. Halyqaralyq júldeleri kóp. Kóp jyl boiy Italiiada, AQSh-ta turyp, bimen kásibi túrde ainalysty. Ol sporttyq bal biinen álemniń vitse-chempiony", - dedi ánshi.
Kópshilik qalyńdyqtyń shash úlgisin talqylaǵan. Ánshiniń aitýynsha, bul olardyń qalaýy ǵana eken.
"Ol toiǵa 10 kún qalǵanda shashyn qysqartty. Biz erkin shyǵarmashylyq adamymyz. Ne bolatynyn bilmedik", - deidi MAKVIN.
Sondai-aq, ol videonyń qalai tarap ketkenin aitty.
"Neden bastaldy. Bizdiń sharany dosymyz Azat Ábiken júrgizgen. Ol uzatý toiynda qalyńdyq maǵan qarai júretin kezinde tússiz sýret jasaimyz dep oilastyrdy. 60-jyldardyń sýretin jasaǵymyz keldi. Bul kadr bir ǵana sýret úshin jasaldy. Sońynda kóp video túsirilip, "Za tebia Bake" paraqshasyna júkteldi. Qalai júktelgeninen beihabarmyz. Bul týraly kelesi kúni ǵana bildik", - dedi oryndaýshy.
MAKVIN óz ata-anasy men týystarynyń qalyńdyqtyń shash úlgisine qandai baǵa bergenin aitty.
"Onyń ata-anasy qalypty qabyldady. Ata-anasy jańashyl, anasy kóp ýaqyt Eýropada turǵan, ákesi jumysy boiynsha álemge saparlap júredi. Iaǵni barlyǵyn durys túsindi. Al myna Jelide jazyp jatqandar tek shý shyǵaryp júr. Olar bolmasa, mundai shýǵa ulaspaityn edi. Meniń ata-anam da bárin jaqsy qabyldady. Meniń otbasymda bári mýzykanttar, rejisserler. Eshqandai da daý-damai bolǵan joq. Meniń týystarym Shymkentten, barlyǵy dástúrdi ustanady. Betasharda bolǵan ájem buǵan tipti qýanyshty. Sebebi men - onyń kenje nemeresimin", - dedi Bazarbaev.
