El ishinde jappai tártipsizdik ornaǵan kezinde áskeri qyzmetshiniń qolyn alyp turǵan balanyń fotosy kópshilikti eljiretti. Búgin sol sýrettegi sarbazdyń kim ekeni anyqtaldy, dep habarlaidy QazAqparat.
Fotodaǵy keiipker - Ulttyq ulan «Ońtústik» óńirlik qolbasshylyǵyna qarasty 6698 áskeri bóliminde qyzmet etetin efreitor Shahrýh Hasanov bolyp shyqty. Ol 4 qańtarda dabyl belgisimen qyzmetke kelgen. Sodan Shymkent qalalyq ákimdiginiń mańyna qoǵamdyq tártip pen qaýipsizdikti qamtamasyz etýge shyqqan.
«Sýret 7 qańtarda túsirildi. Ákimdik aldyndaǵy alańda qyzmet atqaryp turǵanymda bir kishkentai balaqai júgirip kelip, sálem berdi. Balanyń qolyn alyp, basynan sipap, ákesine qarai jiberdim», - deidi Shahrýh Hasanov.
Al osy sátti sol mańaida túsirilim jasap júrgen «Otyrar tv» jýrnalisteri fotoǵa túsirip alǵan. Jeli arqyly taraǵan sýrettiń búginde animatsiialyq beinesi de jasalyp, áleýmettik toptarda keńinen taralyp jatyr.
