Foto ashyq derekkózden alyndy
Astana men Kókshetaýdaǵy jaǵdaidyń artynsha Qaraǵandy turǵyndary Altynsarin atyndaǵy mektep-litseide oqýshylar qysylyp, tolyp turǵan dálizdi videoǵa túsirip aldy. Qaraǵandy oblystyq bilim basqarmasynyń baspasóz qyzmeti ókili bul jaǵdaiǵa pikir bildirdi, - dep habarlaidy Tengrinews.kz.
Áleýmettik jelide mektep-litseidiń dáliziniń videosy tarap, jeli qoldanýshylary arasynda úlken rezonans týdyrdy. Oqýshylardyń ata-analary videoǵa oqý ornynda synyp sany tym kóp ekenin jazǵan. Al keibireýler mundai jaǵdai tek bir mektepte bolyp jatpaǵanyn aitady.
Qaraǵandy oblysy bilim basqarmasynyń baspasóz qyzmeti ókili oqýshy kóp ekenin rastady. Jobalyq qýaty 1200 adamdyq litseide barlyǵy 2999 bala oqidy. Litseide oqý-tárbie protsesi alty kúndik oqý rejimimen úsh aýysymda uiymdastyrylǵan.
"Bul jaǵdai 12 qyrkúiekte 18:35-te ekinshi aýysymnyń altynshy sabaǵynan keiin kiim aýystyratyn bólme mańynda boldy. Kiim aýystyratyn bólmeniń kireberisinde kezekshi ákimshi men muǵalimder boldy. Kezekshiler jaǵdaidy rettedi. Osyndai jaǵdaidyń aldyn alý úshin qosymsha shara qabyldandy. Bul mektepte jyl basynan beri kún, aýysym, rekreatsiia, ashana jáne úzilis úshin arnaiy kezekshi muǵalimder men ákimshiler bar. Sonymen qatar, aýysym boiynsha synyp jetekshiler kezekshi bolady. Oqýshylar tek úzilis kezinde ǵana kezekshilik etedi", - dedi vedomstvo baspasóz qyzmeti ókili.
Sondai-aq, vedomstvo oqý orny aýmaǵynda mektep-litsei syiymdylyǵyn úlkeitý úshin ár aýysymda 300 oqýshyǵa arnalǵan jańa mektep salynyp jatqanyn aitty. Kendala shaǵynaýdanynda taǵy bir jańa mekteptiń qurylysy bastalǵan. Osy eki nysan paidalanýǵa berilgen kezde Altynsarin atyndaǵy mektep-litsei eki aýysymdy oqýǵa kóshedi.
