Gákký mýzykalyq telearnasy ómirden ótken Denis Tenniń oryndaýyndaǵy «She won't be mine» ánin jariialady, dep habarlaidy "Ult aqparat".
«Denis Tendi talantty mýzykant retinde máńgi este saqtaiyq. Ol jýyrda óziniń jeke shaǵyn albomyn shyǵarýdy josparlap júrgen edi. Nazarlaryńyzǵa Denistiń «She won't be mine» atty ániniń resmi nusqasyn usynamyz. Týyndyny bizdiń OfficialGakku telegram-kanalymyzdan tyńdap ári júkteýge bolady», - dep jazdy mýzykalyq telearna Instagram jelisindegi paraqshasynda.
Sportshynyń ózi maýsym aiynyń sońynda jańa án daiyndap jatqanyn habarlaǵan edi.
Eske salsaq, Denis Ten balalyq shaǵynda mýzyka, sondai-aq basqa da sport túrlerimen ainalysyp, túptep kelgende, mánerlep syrǵanaýdy tańdaǵan. Buǵan deiin de Denis Ten jankúierlerine birneshe án oryndap bergen edi.
