Jelide Almaty ákimi Baqytjan Saǵyntaev otyrǵan kólikke shabýyl jasalǵan sáttiń videosy paida boldy. Qala ákimdigi videonyń 6 qańtarda túsirilgenin rastady, dep habarlaidy Sputnik Qazaqstan.
"Almaty qalasy ákimdiginiń baspasóz qyzmeti 2022 jyly 6 qańtarda bolǵan oqiǵanyń beinejazbasy shynaiy ekenin rastaidy. Tergeý júrgizilýine bailanysty qosymsha aqparatty jariialaýǵa tyiym salynady", - delingen ákimdik taratqan aqparatta.
Buǵan deiin megapolis basshysy jappai tártipsizdik kezinde ólim aýzynan qalai aman qalǵanyn aityp berdi.
"Qosymsha kúshter kelip, arnaiy jasaq ákimdik pen alańdy tazartqan kezde biz shtabtaǵy áriptesterimizben birge ákimdikke bara jatqanbyz, jolda bizge oq atty. Olar bizdi kútip turdy, bizdiń kele jatqanymyzdy, baǵytymyzdy bildi. Aldymyzdan shyǵyp, barlyq jaqtan oq jaýdyrdy", - dedi Saǵyntaev.
Sonyń saldarynan ákimdik qyzmetkerleri – sport jáne din basqarmalarynyń basshylary jaraqat alǵan. Sondai-aq Baqytjan Saǵyntaevtyń júrgizýshisi zardap shekti. "Almaty" telearnasynyń júrgizýshisi qaza tapty.
Qazaqstandaǵy búlik
2022 jyldyń basynda eldiń batysynda jappai naryzylyq bastaldy. Oǵan avtokólikke quiatyn gazdyń 120 teńgege deiin qymbattaýy sebep bolǵan. Jańaózen men Aqtaý qalasynyń turǵyndary baǵany 50 teńgege deiin tómendetýdi talap etti. Arnaiy qurylǵan úkimettik komissiia belsendilermen kelissóz júrgizip, bul talap oryndalatynyn málimdedi.
Artynsha basqa qalalardyń halqy da narazylyq sherýine shyǵa bastady.
Al Almatyda narazylyq sońy lańkestik áreketke ulasty. Kóshege shyqqandar politsiia kólikterin qiratyp, ákimshilik ǵimarattardy órtep jiberdi. Almaty politsiia departamentiniń ǵimaratyna shabýyl jasady. Prezident Qasym-Jomart Toqaevtyń aitýynsha, Almaty qalasy men 9 oblys ortalyǵy shabýyldaýshylardyń qolynda bolǵan. Sodyrlar tipti Aqordany da basyp alýdy josparlaǵan. Alaida elordaǵa úsh áskeri kólik ushaǵynyń kelgenin estip, bul josparynan bas tartqan.
Osy oqiǵalardan keiin prezident UQShU-dan kómek surady. Osylaisha Qazaqstanǵa 2 myńnan asa UQShU kúshteri men 250 tehnika kirgizildi. Olar strategiialyq mańyzdy obektilerdi kúzetýge kiristi.
Keiinirek Toqaev Qazaqstanda bilikti basyp alýǵa daiyndyq júrgizilgenin málimdedi. Shabýyldaýshylar halyqtyń avtogaz baǵasyna degen narazylyǵyn jeleý etken.
El biligi búkil respýblikada 19 qańtarǵa deiin tótenshe jaǵdai jariialap, terrorizmge qarsy operatsiia bastady.
Almatydaǵy tártipsizdikterden keiingi shyǵyn 112 milliard teńgeden asady dep eseptelip otyr.
Onyń ishinde biznes oryndaryna kelgen shyǵyn – 67 milliard teńge. Qazir shaǵyn jáne orta bizneske – 42 milliard teńge, iri bizneske kelgen shyǵyn 25 milliard teńge dep baǵalanǵan. Qalada tártipsizdikter kezinde 1 259 naýqas meditsinalyq kómekke júgindi, qazir statsionarlarda 110 naýqas jatyr.
Almatyda búlikshiler 1 600-den astam saýda nysanyn tonap, 356 kólikke zaqym keltirgen. Qalada kúsh qurylymdarynyń 1 097 qyzmetkeri zardap shekti. Meditsinalyq mekemede 5 adam jatyr, ishinde ekeýi aýyr hálde. 9 qyzmetker qaza tapty.
Qazaqstanda jappai tártipsizdikterden keiin aýyr jáne asa aýyr qylmystar boiynsha 695 sotqa deiingi tergep-tekserý bastaldy. 1 002 adam qamaqta otyr.
