Jekeshelendirý aiasynda 125,5 mlrd. teńgege 451 nysan satyldy. Bul jaiynda búgin Úkimet otyrysynda memlekettik nysandardy jekeshelendirý jaiynda baiandama jasaǵan QR Ulttyq ekonomika ministri Timýr Súleimenov málim etti, dep habarlaidy QazAqparat.
Ministrdiń dereginshe, jekeshelendirýdiń 2016 - 2020 jyldarǵa arnalǵan keshendi jospary aiasynda básekeles ortaǵa 878 uiymdy berý kózdeledi. Onyń 68-i iri kompaniialar. Olardyń 14-i respýblikalyq menshikte, 1-eýi kommýnaldyq menshikte, al 53-i ulttyq basqarýshy holdingterdiń qaramaǵynda. Munan bólek qorlardyń quramyna kiretin 168 nysan bar. 50 respýblikalyq uiym men 440 kommýnaldyq menshiktegi nysan da atalǵan jospar aiasynda jeke ielikke ótetin bolady. Al 152 uiym ulttyq basqarýshy holdingterdiń, ulttyq holdingterdiń jáne ulttyq kompaniialardyń menshigindegi nysandar.
Ekonomikany jandandyrý máseleleri jónindegi memlekettik komissiianyń 2017 jylǵy 15 aqpandaǵy usynystary boiynsha QR Úkimetiniń sheshiminiń negizinde «Apattar meditsinasynyń temir jol gospitaldary» AQ-nyń 14 filialy derbes zańdy tulǵalarǵa bólindi jáne «Astana halyqaralyq áýejai» AQ «Kókshetaý aviakompaniiasy» AQ qosyp alý jolymen qaita uiymdastyryldy. Osyǵan bailanysty jekeshelendirý nysandarynyń sany 891-ge deiin kóbeidi», - dedi Súleimenov.
Onyń aitýynsha, búgingi kúni satylatyn nysandardyń sany 589 uiymdy quraidy. Olardyń 488-i biyl, al 101-i kelesi jyly satylady dep josparlanǵan.
«Iri kompaniialardy satý máseleleri turaqty túrde memlekettik komissiianyń otyrystarynda qaralady. Búgingi kúni TOP-68-den 32 aktivti satý tásili boiynsha sheshimder qabyldandy. Onyń ishinde 8 kompaniia respýblikalyq menshikte jáne 24 kompaniia qorlardyń menshigi. Jalpy 2014 jylǵy maýsymnan bastap 2017 jylǵy 23 maýsymǵa deiin 125,5 mlrd. teńgege 451 nysan satyldy»,- dedi ol.
