«Qazaqstan Halyq partiiasy» fraktsiiasy salymshylardyń zeinetaqy jinaǵyn turǵyn úi jaǵdaiyn jaqsartý úshin paidalaný jobasynyń aralyq qorytyndysyn shyǵarý mańyzdy dep sanaidy. Bul týraly Májilistiń jalpy otyrysynda depýtat Aiqyn Qońyrov málim etti, dep habarlaidy "Ult aqparat".
«313 myńnan astam azamattyń arnaiy shotyna 1 trln 400 mlrd teńge aýdaryldy. Olardyń barlyǵy ózderiniń zeinetaqy jinaǵyn kádelerine jaratty. Bul joba tutas ekonomikaǵa áser etti. Budan 2 megapolistegi qurylys ieleri men bankter paida kórdi. Alaida halyqtyń baspanaǵa qoljetimdiligi artqan joq. Másele júieli túrde sheshilmedi. Turǵyn úi máselesi ýshyǵyp ketti. Jalpy ekonomikalyq ósimdi yntalandyrý bastamasy da naqty nátije bermedi. Kerisinshe, turǵyn úi men qurylys materialdarynyń baǵasy sharyqtaýy saldarynan salaǵa jaǵymsyz áser etip, infliatsiianyń údeýine de yqpaly boldy. Zeinetaqy naýqany bastalǵannan beri (2021 jylǵy 1 qańtar) Qazaqstan Respýblikasyndaǵy páter baǵasy 8,3% -ǵa qymbattady. 2020 jylǵy mamyrdan 2021 jylǵy mamyrǵa deiingi aralyqtaǵy ósim shamamen 22% -dy qurady», - dedi A. Qońyrov Premer-Ministrdiń orynbasary Roman Skliardyń atyna joldaǵan saýalynda.
Onyń aitýynsha, Monopoliiaǵa qarsy agenttik baǵany retteýge tyrysýda. Alaida baǵanyń ósýi memlekettiń is-áreketinen emes, BJZQ-dan alynatyn birjolǵy zeinetaqy jinaǵy taýsylǵanda toqtaidy.
«Dúrlikpe suranystyń áleýeti otandyq ónerkásipti damytý úshin paidalanylmady. Ulttyq statistika biýrosynyń dereginshe, otandyq óndiris tabiǵi shikizat bolyp sanalatyn qurylys materialdary resýrstarynda ǵana basym boldy. Sondyqtan zeinetaqy jinaǵymen kóbinese sheteldik jetkizýshiler men otandyq deldaldar investitsiialandy. Turǵyn úi jaǵdaiyn jaqsartý úshin zeinetaqy jinaǵyn paidalaný jobasyn jalǵastyra otyryp, ekinshi kezeńde qosymsha júieli sharalardy iske qosý mańyzdy dep sanaimyz. Ol jeke toptarǵa emes, búkil qoǵamǵa arnalýy kerek. Qazaqstan Halyq partiiasy jeke turǵyn úi qurylysyn damytýǵa baǵyttalǵan «Jer úi» baǵdarlamasyn iske qosýdy qajet dep sanaidy», – dedi depýtat.
Osy oraida ol memleket qazaqstandyqtardyń basym bóligin sapaly ári qoljetimdi turǵyn úimen qamtamasyz etýge basymdyq berýge tiis dep esepteidi.
«Jer úi» jeke turǵyn úi qurylysyn damytý baǵdarlamasy qajetti qurylys materialdarynyń, ilespe taýarlar men kórsetiletin qyzmetterdiń otandyq óndirisin damytý jónindegi sharalarmen súiemeldenýi tiis», - dedi Aiqyn Qońyrov.
