Foto: Aqorda
Prezident Qasym-Jomart Toqaev Qarjy naryǵyn retteý jáne damytý agenttiginiń tóraǵasy Mádina Ábilqasymovany qabyldady. Memleket basshysyna qarjy naryǵyn damytýdyń 2025 jylǵy nátijeleri men aldaǵy kezeńge arnalǵan mindetter týraly baiandaldy, dep habarlaidy Ult.kz.
Bizneske berilgen kreditter 2025 jyldyń qarashasyndaǵy jaǵdai boiynsha 17,9 paiyzǵa artyp, 14,8 trillion teńgege jetken.
Kásipkerler 17,5 trillion teńgege jańadan nesie resimdedi. Bankter jalpy somasy 2,3 trillion teńge bolatyn 8 sindikattalǵan jobany birlesip qarjylandyrdy.
Shaǵyn jáne orta biznesti kreditteý isin qoldaý úshin 2025 jyldyń maýsym aiynda «Damý» qorynyń janynan Kepildik qory quryldy. Búginge deiin 505 milliard teńge kóleminde nesie kepildikteri berildi.
Jeke tulǵalardyń bankrottyǵy týraly zań qoldanysqa engeli beri bankter 56 myń adamnyń 209,7 milliard teńge bereshegine keshirim jasady.
Ipotekalyq turǵyn úi zaimdaryn qaita qarjylandyrý baǵdarlamasy aiasynda 1,2 myń qaryz alýshyǵa qoldaý kórsetildi.
Agenttik óziniń qadaǵalaý qyzmeti aiasynda bankterge 2025 jyly 49 ret inspektorlyq jáne qujattamalyq tekseris júrgizgen.
