Eger qazir jeke menshik mektep salýdy qolǵa almasaq, 2025 jyly mekteptegi oryn jetispeýshiligi 470 000-ǵa jetýi múmkin. Bul týraly «Orta bilim salasyndaǵy memlekettik-jekeshelik áriptestik: jekemenshik mektepter» taqyrybynda ótken onlain konferentsiiada aityldy, dep habarlaidy QazAqparat.
«Memlekettik mektep qalai salynady?» degen suraqqa keletin bolsaq, bul mektep qurylysy ǵana emes ekenin túsinemiz. Memlekettik mektep salýǵa jer bólip berý, injenerlik kommýnikatsiia, kúrdeli jáne aǵymdaǵy jóndeý máseleleri kiredi. Sonda mektep qurylysynyń ózine ǵana 3-6 mlrd teńge ketedi. Sonymen qatar, ony kerek-jaraqpen qamtý úshin jylyna 300 mln teńge qajet bolady. Ár toǵyz jyl saiyn aǵymdaǵy jóndeý jumystary úshin 600 mln teńge ketedi. Memlekettiń bir jeke menshik mektepke bóletin shyǵynyn salystyrsaq, bir oqýshy úshin jylyna 284 000 teńge ketedi. Bul – operatsiialyq shyǵyn. Al amortizatsiialyq shyǵyn 266 000 teńge bolady. Demek, 1200 oryndyq mektepti alatyn bolsaq, biýdjetten 3,5-4 mlrd teńge únemdeýge bolady», - deidi «Qarjy ortalyǵy» AQ Prezidenti Asqar Ibraimov.
Ol memlekettik tapsyrysty jariialaǵan kezde qarjylai ǵana paida bolmaitynyn aitty.
«Pedagogtar úshin eńbek shartynyń jaǵdaiy, bilim berý ortasynyń jaǵdaiy, sondai-aq oqýshylarǵa oryn jetpei qalý máselesi jaqsarady. Mysaly, Shymkent - jeke menshik mektepterdi damytý boiynsha kóshbasshy. 2019 jyly ol jaqta 22 jeke menshik mektep ashylǵan. Bul jeke menshik mektepterge memlekettik mektepterden 6764 oqýshy aýysyp barǵan. Saraptama jasaǵan kezde memlekettik mektepterdegi oqýshylarǵa 16 000 oryn jetpegen. 2020 jyly Shymkentte kem degende taǵy 11 jeke menshik mektep ashylady. Ol jaqqa 7690 oqýshy aýysyp barady. Eger bári jospar boiynsha bolsa, jeke menshik mektep salý arqyly mekteptegi oryn jetispeý máselesin 90% shesher edik. Eger osyndai qadamdar jasamasaq, 2025 jyly mektepte oryn jetispeý kórsetkishi 470 000-ǵa jetýi múmkin», - deidi ol.
