QR Tsifrlyq damý, innovatsiialar jáne aeroǵarysh ónerkásibi ministrligi Aqparattyq qaýipsizdik komitetiniń tóraǵasy Rýslan Ábdiqalyqov sertifikat jumysynyń tetikterin túsindirip berdi, dep habarlaidy "Ult aqparat".
«Júieniń ózi avtomattandyrylǵan rejimde jumys isteidi. Iaǵni, paidalanýshy qaida barǵanyn, ne istegenin, qandai qupiia sóz engizgenin eshkim qadaǵalap otyrmaidy. Ol tyiym salynǵan kontentti naqty buǵattaýǵa ǵana baǵyttalǵan. Qarapaiym tilmen aitar bolsaq, mashina trafikke qoljetimdilik alady jáne sol trafikten óziniń qara paraqshasyna engizilgen siltemelerdi tabýǵa tyrysady. Ol paidalanýshyda júieden tys ótip bara jatqan siltemeni ózindegi qara tizimmen salystyrady. Eger ol sáikestikti anyqtasa, onda mundai suraý salý toqtatylyp, paidalanýshy eshqandai jaýap almaidy. Ne bolmasa «404 betke» degen jazbany kóredi», - dedi ol Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, basqa kez kelgen jaǵdaida mashina atalǵan aqparatpen eshteńe jasamaidy. Onyń barlyǵy avtomattandyrylǵan.
«Birinshiden, onymen adamdar jumys istemeidi. Ekinshiden, azamattarymyzdy bul turǵyda Konstitýtsiia qorǵaidy. Bul mashinadan qandai da bir naqty adamǵa qatysty málimetter alý úshin Jedel izdeý qyzmeti týraly zań, Qylmystyq-protsessýaldyq kodeksi bar. Quqyq qorǵaý jáne arnaýly organdardyń mundai barlyq is-áreetine joǵarydan qadaǵalaýdy Bas prokýratýra júzege asyrady. Bul aqparattardy bireýlerdiń óz betinshe alýy jáne paidalanýy zańsyz sanalady», - dedi Rýslan Ábdiqalyqov.
