Foto: Ashyq derekkózden
QR Premer-ministri Oljas Bektenov 16 million qazaqstandyqtyń jeke derekteriniń tarap ketýine bailanysty jańa málimet aitty, dep habarlaidy Ult.kz.
Onyń aitýynsha, 2022 jylǵy derekter tarap ketken.
"Árine, bul eshkimge, ásirese Úkimetke abyroi ákelmeidi. Ókinishke qarai, mundai faktiler bar", – dedi premer-ministr.
Derekterdiń taralýyna bailanysty quzyrly organdar tekseris júrgizip jatqan kórinedi. Oljas Bektenov derekter meditsinalyq uiymdar arqyly taraýy múmkin degen boljam aitty.
"Tekserýshilerdiń qolyndaǵy aldyn ala málimetterge sáikes, derekterdiń taraý kózi meditsinalyq uiymdar bolýy múmkin. Olar memlekettik derekter bazasyna qol jetkize alady, biraq keiin onyń qaýipsizdigin qamtamasyz etpeidi. Tiisti jaýapkershilik bar. Zańnama jáne quqyqtyq turǵyda áreket etemiz", – dedi Premer-ministr.
Al alaiaqtar turǵyndarǵa qońyraý shalýyn qashan doǵaratynyn suraǵan tilshige, Bektenov naqty jaýap bere almaitynyn aitty.
"Qońyraýlar erteń toqtaidy demeimin. Alaiaqtardyń 67 million qońyraýyn toqtatqanymyzdy aittym. Olar habardasa almady. Nómir sóndirilip jatyr – SIM-karta istemeidi, bul – máselemen kúresýdiń bir bóligi", – dedi Bektenov.
Sonymen qatar Úkimet basshysy dipfeiktermen de jumys júrgizip jatqandaryn aitty. Onyń sózinshe Ishki Ister ministrliginde arnaiy bólim paida boldy jáne Ulttyq bank janynda antifrod-ortalyq jumys istep jatyr.
