«Bolashaq» stipendiiasynyń iegeri almatylyq Aidos Berdibaev jeke derekteriniń qoldy bolýynan AQSh-qa viza ala almai júr. Búgin ol QR Syrtqy ister ministrinen kómek surady, dep habarlaidy "Ult aqparat".
«Bolashaq» baǵdarlamasymen Amerikada oqýym kerek edi. Tildik kýrstardy aiaqtaǵan soń, stýdenttik vizany jańartyp, AQSh-ta akademiialyq bilim alý úshin Qazaqstanǵa oraldym. Biraq, Almatydaǵy AQSh Konsýldyǵy maǵan viza berýden bas tartty, sebebi Abzal Muqashev esimdi qazaqstandyq meniń anketalyq derekterimdi paidalanyp, jalǵan qujattarmen ainalysqan. Ol meniń aty-jónimdi kórsetken. Sondyqtan, 212 A babymen (Sheteldikter kontrabandasy) maǵan jáne áielime vizaǵa tyiym salyndy», - dedi A. Berdibaev «Nur Otan» partiiasyndaǵy qoǵamdyq qabyldaýda.
Osydan keiin A. Berdibaev IIM jáne prokýratýraǵa birneshe ret habarlasqan.
«Qylmys tabylmady degen jeleýmen is jabylyp qala berdi. Konsýldyqpen birneshe ret kelissózder júrgizgen soń, amerikalyq tarap maǵan aqtalýǵa, jaǵdaidy túsindirýge sońǵy múmkindik berip otyr. Men úshin bul vizany alý mańyzdy. Sebebi, viza berilmese 10 mln teńge qaryz moinyma júkteledi nemese ákemniń úiin alyp qoiady», - dedi almatylyq turǵyn.
Óz kezeginde Muhtar Tileýberdi AQSh Bas konsýldyǵymen taǵy bir ret kezdesý qajettigin aitty.
«Iá, zań boiynsha «Bolashaq» talaptarynyń qatal ekenin bilemiz. Konsýldyq qyzmet departamentiniń qyzmetkeri dúisenbi kúni Almatyda bolady jáne sizben kezdesedi. Sosyn AQSh Bas konsýldyǵyna baryp, kelissózder júrgizesizder. Olarǵa ne qajet ekenin taǵy anyqtaý kerek. Eger «Bolashaq» baǵdarlamasynyń stipendiaty ekenińizdi resmi rastaý kerek bolsa, qujattardy ázirlegen jón. Sonda biz QR SIM resmi notasymen sizge viza berý týraly saýal joldaimyz. Bizdiń ókilimiz sizben kezdesý úshin Almatyǵa arnaiy barady», - dep jaýap berdi ministr.
Aita keteiik, QR Syrtqy ister ministri Muhtar Tileýberdi «Nur Otan» partiiasynda qoǵamdyq qabyldaý ótkizip, turǵyndardyń máselelerin tyńdady.
Buǵan deiin ministr Qytaida esirtki kontrabandasymen aiyptalǵan otandasymyz Aqjarqyn Turlybai isi týraly pikir bildirgen edi.
