Búgin, 26 shilde kúni, Qyrǵyzstan men Tájikstan prezidentteri Sooronbai Jeenbekov pen Emomali Rahmon birlesip, Batken aýdanynyń Aqsai aýyly men Isfara qalasy Vorýh aýyldyq keńesiniń Todjikon eldi mekeni tusyndaǵy qiylysqan ýchaskesinde shekara mańynda ornalasqan aýdandardyń turǵyndarymen kezdesý ótkizdi, dep habarlaidy QazAqparat HAA Kabar agenttigine silteme jasap.
Qyrǵyz Respýblikasy prezidentiniń aqparat saiasaty bóliminiń málimetinshe, eki eldiń basshylary resmi delegatsiia múshelerin tanystyryp ótken.
Jergilikti turǵyndarmen kezdesý barysynda qos eldiń prezidentteri eki halyq arasyndaǵy birlik pen kelisimdi, ǵasyrlar boiǵy dostyq qarym-qatynasty saqtap qalǵan jón bolatynyn jáne taraptardyń shekarada oryn alǵan barlyq qiyndyqtardy joiý úshin qajetti sharalardy qabyldaýǵa daiyn ekenin atap ótti.
Jeenbekov Qyrǵyzstan eli Tájikstanmen baýyrlastyq qarym-qatynasty qadirleitinine erekshe toqtaldy.
«Biz shekarada ornalasqan aýdandarda turatyn halyqtarymyzdyń jaǵdaiyn jaqsy bilemiz. Barlyq sheshilmegen máselelerden habardarmyz jáne jergilikti turǵyndardyń qiyndyq kórmeýi úshin qolymyzdan kelgenin jasaýǵa ázirmiz. Shekaramyzdy birlik, dostyq pen kórshilik qaqpasy etkimiz keledi. Sheshilmeitin másele joq dep oilaimyn», - dedi Jeenbekov.
Eki eldiń basshylarynyń kelissózderi erteń, 27 shildede, Sholpan Ata qalasynda jalǵasady.
