Qyrǵyzstan prezidenti Sooronbai Jeenbekov eldiń burynǵy basshysy Almazbek Atambaevtyń isi zań aiasynda sheshilýi tiis ekenin málimdedi.
Memleket basshysynyń baspasóz qyzmeti Shý oblysy Panfilov aýdany turǵyndarynyń suraǵyna jaýap bere otyryp, burynǵy prezidentke qatysty jaǵdaiǵa túsinikteme berdi, dep jazdy Sputnik Qyrǵyzstan.
"Qyrǵyzstandyqtardy Almazbek Atambaevtyń ainalasyndaǵy jaǵdaiǵa qatysty meniń kózqarasym qyzyqtyryp otyrǵanyn bilemin. Sońǵy kezderi onyń ainalasynda bolyp jatqan oqiǵa, onyń ishinde Atambaevtyń tergeýge shaqyrylýy – zańdy qubylys. Quqyqtyq memlekette tek qana zań aiasynda áreket etý kerek. Adam kim bolsa da – burynǵy prezident pe, sheneýnik pe, áskeri nemese qarapaiym qyzmetker me – bári zań aldynda teń. Sonda ǵana el damidy. Atambaevtyń isi de Qyrǵyzstan zańnamasy aiasynda sheshilýi tiis", — dep atap ótti prezident.
Eske sala ketsek, 13 maýsym kúni Qyrǵyzstan parlamenti arnaiy komissiia qurǵan bolatyn. Komissiia Almazbek Atambaevtyń alty qylmysqa qatysy bar bolýy múmkin degen qorytyndy jasady. 20 maýsym kúni Jogorký Kenesh bul qorytyndyny maquldap, Bas prokýratýraǵa jibergen.
Keiin bas prokýror alty faktiniń beseýi boiynsha qylmystyq is qozǵaýǵa negiz bar ekenin aitty. 27 maýsym kúni Jogorký Kenesh Atambaevty eks-prezident mártebesinen aiyrý týraly sheshim qabyldady.
Budan soń saiasatkerdiń úiiniń mańynda jaqtastary jinala bastady. IIM tergeý toby Atambaevty úsh ret jaýap alýǵa shaqyrdy. Alaida ol barǵan joq. Jogorký Kenesh sheshimin zańsyz dep sanaitynyn alǵa tartqan. Atambaev Kostitýtsiialyq palataǵa talap joldady.
