Qazaqstan Jazýshylar odaǵynyń Túrkistan oblystyq filialynyń tóraǵasy sailandy, dep habarlaidy QazAqparat Túrkistan oblysy ákiminiń baspasóz qyzmetine silteme jasap.
Túrkistanda aqyn-jazýshylardyń «Túrkistan – Táýelsizdik tuǵyrynda» atty kezdesýi ótti. Rýhani mańyzy bar basqosýǵa Qazaqstan Jazýshylar odaǵy basqarmasynyń tóraǵasy, aqyn Ulyqbek Esdáýlet, tóraǵa orynbasarlary – jazýshy Mereke Qulkenov, aqyn Aqberen Elgezek jáne Qazaqstan Jazýshylar odaǵy basqarmasynyń hatshysy, aqyn Qasymhan Begmanov bastaǵan respýblikanyń jáne Túrkistan oblysynyń qalamgerleri qatysty. Jiyndy Túrkistan oblysy ákiminiń orynbasary Sáken Qalqamanov júrgizip otyrdy.
Táýelsizdik merekesiniń 30 jyldyǵyn Túrkistan óńiri tolaiym tabystarmen, oń ózgeristermen qarsy alyp otyrǵanyn aitqan ol, shahardy damytýda aqyn-jazýshylarǵa da artylar júk az emes ekenin jetkizdi. Oblys ákimi Ómirzaq Shókeevtiń atynan jazýshy Mereke Qulkenovtiń 70 jyldyǵyna arnalǵan quttyqtaý hat men syi-siiapatyn tapsyrdy. Sonymen birge Jazýshylar odaǵynyń tóraǵasynyń iyǵyna da shapan jabyldy.
Qazaqstan Jazýshylar odaǵy basqarmasynyń tóraǵasy, aqyn Ulyqbek Esdáýlet odaqtyń tynys-tirshiligi men josparlary týraly aityp berdi. Jańa tynysy ashylǵan Túrkistannyń ádebieti de óz biiginen túspei, óńirmen birge órkendeýi tiis ekenin jetkizdi. Jiynda Túrkistan óńiriniń 13 qalamgerine Qazaqsan Jazýshylar odaǵynyń músheligine qabyldanǵany jónindegi kýálikteri tapsyryldy. Olardyń arasynda jalyndy jastar da, orta býyn ókilderi de bar. Sonymen birge oblys aqyn-jazýshylary men Jazýshylar odaǵy basshylyǵynyń qoldaýymen Aidar Seidázim Qazaqstan Jazýshylar odaǵy Túrkistan oblystyq filialynyń tóraǵasy bolyp sailanyp, buiryǵy jurtshylyqqa tanystyryldy.
Qalamgerlerdiń keleli keńesinde ádebietke qoldaý kórsetý, óńirdiń rýhani áleýetin kóterý, jas aqyn-jazýshylardyń sheberligin shyńdaý baǵytynda usynystar men pikirler aityldy. Oblystyq filialdyń jańa tóraǵasyna sáttilik tilep, ádebietti qoldaý baǵytynda tyń bastamalardy qolǵa alyp, qairatkerlik tanytaryna senim bildirdi. Aqyn Murat Bekei, jazýshy, ádebiet zertteýshisi Qulbek Ergóbek, aqyn Nurmahan Nazarov jáne ózge de qalamgerler usynys-pikirlerin ortaǵa saldy.
Rýhani basqosýdy túiindegen Sáken Qalqamanov jiyndaǵy bastamalar eskerýsiz qalmaitynyn jetkizdi.
«Túrkistan qalasynda túrli mádeni nysandar boi kóterip, basym kópshiligi paidalanýǵa berildi. Endi osy mádeni nysandarda túrli ádebi is-sharalar, aqyn-jazýshylardyń keshteri, jańa týyndylardyń tusaýkeserleri ótip turady. Aldaǵy ýaqytta Qazaqstan Jazýshylar odaǵymen birlese otyryp, Túrkistan óńiriniń rýhaniiatyna oń ózgerister alyp keletin mańyzdy jumystardy birge atqaratyn bolamyz», - dedi ol.
