Almatyda Abai atyndaǵy qazaq memlekettik akademiialyq opera jáne balet teatrynda Qazaqstan Jazýshylar odaǵynyń jáne «Qazaq ádebieti» gazetiniń 85 jyldyq mereitoiyna orai pleným ótti, dep habarlaidy QazAqparat.
Halyqaralyq jiynǵa 8 elden Jazýshylar odaǵynyń basshylary, músheleri keldi.
Otyrys aldynda qazaq ádebietiniń qara shańyraǵyna ainalǵan kieli ordanyń 85 jyldyq tarihynan syr shertetin beinerolik kórsetildi.
Qazaqtyń úsh báiteregi - Sáken Seifýllin, Beiimbet Mailin, Iliias Jansúgirovtiń 125 jyldyǵyn arqaý etken saltanatty jiynǵa QR Memlekettik hatshysy Qyrymbek Kósherbaev qatysyp, baiandama jasady.
«Biyl - "Qazaq ádebieti" gazetiniń 85 jyldyq mereitoiy. Sondai-aq, osynaý qara shańyraqtyń negizin qalaýshylar: qazaqtyń úsh báiteregi Sáken Seifýllin, Iliias Jansúgirov, Beiimbet Mailinniń týǵanyna biyl 125 jyl tolyp otyr. Qazaq eli qashanda jazýshylar qaýymdastyǵyn janyna súieý, rýhyna tireý sanaidy. Ejelden sóz ónerin kie tutqan qazaq ótken ǵasyrdyń basynda bir uiymǵa uiysqan aqyn-jazýshylar qaýymdastyǵynda dál osyndai úlken úmit artqan bolatyn. 85 jyldyq tarihynda sóz zergerleri sol úmitti el seniminiń temir qazyǵyna ainaldyra bildi. Qazaqstan Jazýshylar odaǵynyń bir ǵasyrǵa jýyq tarihyn tarata zertteitin bolsaq, odan qazaqtyń qily kezeńderimen tutasyp jatqan júzdegen tomǵa júk bolatyn qyzyǵynan qasireti basym, taýqymetti taǵdyrlardyń shejiresin kóremiz», - dedi Qyrymbek Kósherbaev.
«Óner aldy - qyzyl til» demekshi, halqymyzdyń qadir tutqan óneriniń biri - ádebiet ekeni ras», - dep atap ótti óz sózinde Almaty ákimi Baqytjan Saǵyntaev.
«Búginde 800-den astam qalamgerdiń basyn biriktirip otyrǵan kieli uiym - Jazýshylar odaǵynyń qurylǵanyna 85 jyl toldy. Sáken Seifýllin irgesin qalaǵan Jazýshylar odaǵyn ár jyldary Iliias Jansúgirov, Sábit Muqanov, Ábdilda Tájibaev, Ǵabit Músirepov, Áli Sháripov, Ánýar Álimjanov, Oljas Súleimenov, Nurlan Orazalin basqarǵan. Qazaq sózi qiyn-qystaý zamandardy basynan ótkerdi. Qazaq tili qarjy, sot, ekonomika salasynan yǵystyrylyp ógei kúi keshkeni anyq. Tap sol kezeńderde qazaq tili pana tapqan jalǵyz uiym Jazýshylar odaǵy bolatyn», - dedi qala ákimi.
Sonymen qatar jiynda QR Jazýshylar odaǵy basqarmasynyń tóraǵasy Ulyqbek Esdáýlet baiandama jasap, atalǵan uiymnyń osy jyldar aralyǵynda jetken jetistikteri men atqarylǵan aýqymdy jumystaryna toqtaldy.
