Ulystyń uly kúni - áz naýryz merekesi elimizdiń ár túkpirinde toilanyp jatyr. Osy bir aitýly meiramdy qalamgerler qaýymy da erekshe yqylaspen qarsy aldy. Qazaqstan Jazýshylar odaǵy uiymdastyrǵan naýryz toiy araǵa birneshe jyl úzilis salyp, qaita jańǵyryp otyr.
Mereke kúni Jazýshylar odaǵynyń ǵimaraty aldyna arnaiy kiiz úiler tigilip, naýryz kóje ázirlenip, ulttyq meiram dýmany airyqsha saltanatpen ótti.
Qazaqstan jazýshylar odaǵy basqarmasynyń tóraǵasy, Qazaqstan Respýblikasy Memlekettik syilyǵynyń iegeri, aqyn Ulyqbek Esdáýlet merekelik sharany ashyp, quttyqtaý sóz sóiledi. Jinalǵan jurtshylyqqa izgi tilegin aityp, jańa jyldyń jaqsy jańalyqtarǵa toly bolýyna tilektestik bildirdi.
Qazaqstannyń Halyq jazýshysy Qabdesh Jumadilov aqsaqaldar atynan sóz alyp, batasyn berdi.
Kesh barasynda aqyndar qaýymy óleń oqyp, jyrdan shashý shashty. Maraltai Raiymbekuly, Amanǵazy Káripjan, Erlan Júnis bastaǵan aqyndardyń óleń-jyry kesh kórkin qyzdyrdy.
Birqatar jazýshylarǵa Qazaqstan Respýblikasynyń Mádeniet jáne sport ministri Arystanbek Muhamediulynyń quttyqtaýy tabys etildi.
Qazaqstan jazýshylar odaǵynyń jańa basshysy Ulyqbek Esdáýlet jazýshylar odaǵynda abyroily eńbek etip, erekshe kózge túsken birqatar qyzmetkerdi alǵys hatpen marapattady.
«Aq jaýyn» Memlekettik kameralyq orkestri shymyldyǵyn túrgen naýryz toiynda tanymal óner ieleri óz ánderin tartý etti.
Qonaqtar Jazýshylar odaǵynyń ǵimaraty aldynda tigilgen kiiz úilerge aialdap, naýryz kóje iship, arnaiy jaiylǵan dastarhannan dám tatty.
Naýryz toiyna jinalǵan aǵaiynnyń mereii tasyp, aq tilegin aqtaryp, merekeni erekshe qýanyshpen ótkizdi.
