13 sáýir kúni Qazaqstan Jazýshylar odaǵy jáne Qazaqstan Respýblikasy Kásipodaqtar federatsiiasy arasynda Yntymaqtastyq týraly Memorandýmǵa qol qoiý rásimi ótti.
Qujatqa Kásipodaq federatsiiasy atynan Tóraǵa Baqytjan Ábdiraiym jáne Qazaqstan Jazýshylar odaǵy atynan Tóraǵa Ulyqbek Esdáýlet qol qoidy.
Kásipodaqtardyń elimizdegi eńbekkerlerdiń quqyǵyn, táýelsizdigi men zańdy múddelerin qorǵaý, quqyqtyq mádeniet qurý baǵdary Elbasynyń «Qazaqstan – 2050», «Ult jospary – 100 naqty qadam», «Bolashaqqa baǵdar: rýhani jańǵyrý» baǵdarlamalarynda qoiǵan mindetterimen úndes bolyp keledi.
Memorandým aiasynda Qazaqstan Jazýshylar odaǵynda salalyq kásipodaq qurý qarastyrylǵan.
Memorandým shyǵarmashylyq adamdarynyń áleýmettik-ekonomikalyq jáne eńbek quqyqtary men múddelerin qorǵaý júiesin damytýdy, ózara bailanys pen qurylymdy áriptestikti qamtamasyz etýdi kózdeidi.
Eki jaqty kelisilgen baǵdarlamalardan, jobalardan tys Kásipodaqtar federatsiiasy tarapynan zeinetker jasyna jetken Qazaqstan Jazýshylar odaǵynyń músheleri úshin kásipodaq shipajailaryna jeńildik ádisimen joldama bólý máselesi qaraldy.
Budan keiin zeinetker jasyna jetken Odaq músheleri shipajailarda jeńildikpen em qabyldap, kókeide júrgen shyǵarmalaryn jaza alýǵa múmkindik alady.
Qazaqstan Jazýshylar odaǵynyń negizgi mindeti qashannan el ádebietin jasaityn qalamgerlerge jaǵdai jasaý, únemi qamqor bola bilý. Osyndai abyroily mindettiń bir parasy memorandýmnyń aiasynda jasalmaq.
Buryn aqyn-jazýshylarǵa jasalǵan jaǵdai týraly, ártúrli shipajailarda, shyǵarmashylyq úilerinde jazylǵan týyndylar jaily kóp estitinbiz. Endi mine, Táýelsiz Qazaqstan ádebietiniń maitalmandary – osy zamanǵy qalamgerlerdiń erkin shyǵarmashylyqpen ainalysýyna jaǵdai jasalyp jatyr.
Qazaqstan Jazýshylar odaǵy aldaǵy kúnderi de qalamgerlerdiń erkin shyǵarmashylyqpen ainalysýyna jaǵdai jasaý jolynda qyrýar jumys atqaratyn bolady.
