Biyl Qazaqstan Jazýshylar odaǵynyń qurylǵanyna 85 jyl tolyp otyr. Odaq Almaty qalasynda ornalasqany kópke málim. Qalamgerler uiymy qanatyn jaiyp, elordada filialy ashylyp jatyr. Aitýly dataǵa orai Qazaqstan Jazýshylar odaǵy Nur-Sultan qalalyq filialynyń direktory, Qazaqstannyń eńbek sińirgen qairatkeri, Halyqaralyq «Alash» ádebi syilyǵynyń iegeri, aqyn, ádebiettanýshy Dáýletkerei Kápulymen ádebiettiń búgini men erteńge betalysy, filialdyń aldaǵy ýaqytqa jospary jaily az-kem áńgimelesip qaitqan edik...
- Jazýshylar odaǵynyń elordada filialy ashylyp jatqany qutty bolsyn! Nur-Sultan qalasy eldiń rýhani astanasy da bolýy tiis. Resmi ashylǵannan keiin ádebiettiń damýyna bul filial qandai úles qosady? Qandai josparlaryńyz bar?
- Ádebiette jospar degen dúnieniń ózi abstraktili nárse ǵoi. Júz qoidan júz jiyrma qozy alatyndai esep beretin sharýa emes. Ádebiettiń úderisin, jalpy, ýaqyt kórsetedi. Degenmen de buǵan uiymdastyrý sharalary kerek. Nur-Sultan qalasynda Jazýshylar úii ashylý aldynda tur. Barlyq dúnielerin daiyndap jatyrmyz. Qalalyq ákimdik óz balansynda turǵan jeke ǵimaratty berdi. Eki ai jóndeý jumystaryn jasady. Jihazdaryn qoidy. Budan basqa da ákimdiktiń rýhaniiatqa jasap jatqan qamqorlyǵyn aita ketý kerek.
- Máselen, qai isterin atap óter edińiz?
- Kúzde I Aziia forýmy kezinde Abai kóshesiniń boiynda «Qalamgerler alleiasyn» ashqanbyz. Sol alleianyń ishinde 11 jeltoqsanda úsh arys – Sáken, Iliias, Beiimbetke eskertkish qoiylady. Qazir sonyń daiyndyq jumystary júrip jatyr. Taqtasynda «Qazaqtyń irileri – Abaidyń inileri» degen sóz bolady. Kákimbek Salyqov aǵamyzdyń úsh arysqa arnaǵan áni ǵoi. Osydan alyp otyrmyz. Bul da bolsa bizdiń súiinshilep aitatyn jańalyǵymyz.
Odan bólek, bizdiń kemeńgerimiz, Qazaqstannyń Eńbek Eri, halyq jazýshysy, kórnekti qoǵam qairatkeri Ábish Kekilbaiulynyń 80 jyldyǵyna orai bir aptanyń kóleminde bizdiń memleketimizde úlken jiyndar ótti. Eki aiǵa jalǵasqan is-shara aiasynda týǵan ólkesi Mańǵystaýda tarihi-ólketaný murajaiy Ábish Kekilbaiuly atyna berilip, aldyna eskertkishi qoiyldy. Ony Prezidentimiz Qasym-Jomart Toqaev baryp ashty. Búkil qazaqtyń ziialylary Ábishtiń týǵan aýyly Ondyǵa deiin bardy. Úlken ǵylymi-praktikalyq konferentsiialar boldy.
Eýraziia ulttyq ýniversitetinde de 5 jeltoqsan kúni halyqaralyq konferentsiia ótti. Memlekettik hatshy Qyrymbek Kósherbaev ózi kelip ashyp, Prezidenttiń quttyqtaýyn jetkizdi. Onyń aldynda Fariza apamyzǵa Nur-Sultan qalasynan kóshe berildi. As berildi. Fariza oqýlary ótip jatyr. Mádeniet jáne sport ministrliginiń qoldaýymen Ulttyq akademiialyq kitaphananyń uiymdastyrýymen «Ábish álemi» kongresi ótti. Úsh kúnge sozylǵan keremet is-sharalar boldy. Munyń barlyǵy ádebietke jasalyp jatqan qamqorlyq dep oilaimyn.
- Kúni keshe Almatyda Jazýshylar odaǵynyń 85 jyldyǵyna orai pleným ótti. Sol týraly aita ketseńiz?
- Pleným ótti. Jazýshylar odaǵy — úlken qara shańyraq. Ony bizdiń alyptarymyzdyń basqarǵany, otaý retinde kóterip, ordaǵa ainaldyrǵany málim. Jalpy, Keńes úkimeti tusynda Jazýshylar odaǵy úlken bir ideologiianyń rólin atqarǵan sekildi. Nege deseńiz, kommýnistik partiianyń qyzmeti óz aldyna, jazýshynyń, aqynnyń júrgizetin ideologiiasy basqa boldy. Sol kezdegi barlyq partiialyq nomenklatýralardan shyqpai, sonyń sheńberinde jumys isteý ulttyń joiylýyna ákep soǵatyn edi ǵoi. Sondyqtan sol kezdegi aqyn, jazýshylarymyz ulttyq mentalitetti saqtap qalý úshin basyn báigege tikti. Ulttyń «Ózin», «Menin» joǵaltpai, rýhaniiat bolmysynyń ózegin saqtap qalýda sol qara shańyraqtyń róli óte zor boldy dep aita alamyz. Sol shańyraqtyń 85 jyldyǵy jáne Qazaq ádebieti gazetiniń de 85 jyldyǵy. Jazýshylar odaǵyna, jalpy qalamgerler qaýymyna úlken kóńil bólinip otyr. Biz bir nárseni túsinýimiz kerek, jańaǵy keńes úkimeti tusynda aqyn, jazýshylardyń shyqqan kitabyna alyp otyrǵan qalamaqysy, bastaryna beriletin baspana boldy. Kerek deseńiz, eshkimniń qoly jete bermeitin avtokóliktiń barlyǵy sol jazýshylarǵa kezek-kezegimen berilip otyrdy ǵoi. Odan keiin Táýelsizdik alǵan tusta, ózimizdiń ekonomikamyzdy tiktep úlgermegen kezde aqyn, jazýshylarymyz sál abdyrap qaldy. Qalamaqysyz qaldy, jumyssyz qaldy, kitap shyqpai qaldy. Osynyń barlyǵy ishki janaiqailarynda boldy, biraq degenmen de ádebietti óltirmedi ǵoi.
- Óz sózińizden suraq qoiǵym keledi. Sovet odaǵy kezinde ultty saqtaý úshin jazýshylardyń óz ideologiiasy boldy dedińiz. Táýelsizdikten keiin bizdiń aqyn, jazýshylardyń ulttyq rýhty asqaqtatý úshin ózindik ideologiialary boldy ma? Bolsa, kimderden kórdińiz?
- Óte jaqsy boldy. Men sizge aitaiyn, sol sovet úkimeti kezinde partiianyń aqyryp turǵan ýaqytynda «Raiymbek» dep Muqaǵalidyń poema jazýy, Jubannyń «Men qazaqpyn» dep jyr jazýy... Onyń ishinde de keibir shýmaqtar boldy. Búkil poemanyń barlyq bolmysyn kitapqa kirgizý úshin, jaryqqa shyǵarý úshin «Men qazaqpyn, beldimin, baitaq elmin, Qaita týdym, ómirge qaita keldim. Men myń da bir tirildim qaita ólmeske, Men Lenin esimin aita keldim» degen shýmaqty qospasa, ol poema shyqpaityn edi. Sondyqtan, «istikti de kúidirmei, tóstikti de búldirmei» qazaqtyń rýhyn syidyryp turyp sol ýaqytta berý myqtylyq edi. Ádebiette «ýaqyt jáne keńistik» degen uǵym bar ǵoi. Keńshilik Myrzabekovtiń de poemasy boldy. «Boz bie» me edi, jerdi jyrtyp tastaǵan tyń igerý kezinde óziniń aita almai turǵan dúniesin jylqynyń jan-dúniesimen beredi. Osyndai nárseler óte kóp boldy, olar qysymda boldy. Qazaq uǵymymen aitsaq, aýyzdary tumyldyryqtaýly boldy, kózderi tomaǵaly boldy, balaq baýly boldy. 1952-54 jyly partiianyń qaýlysymen bizdiń halyq aýyz ádebietindegi batyrlar jyrynyń, ertegilerdiń sottalǵanyn bilesiz ǵoi. Batyrlar jyrynan «Qara qasqa atty Qambar» qaldy, sebebi ol kedei tabynan shyqqan edi. Endi, táýelsizdik ala qalǵan kezde barlyq batyr, bi, handarymyzǵa as berile bastady. Bógeýde turǵan tasqyn sýdai laq ete qaldy. Osy kezde tarihi romandar edel-jedel shyqty.
- Qai romandardy atar edińiz?
- Qabanbai batyr týraly Qabdeshtiń «Darabozy». Sovet kezinde jazylǵan «Eleń-alań» da, «Alasapyran» da, osynyń bári jalpy halyqtyń, jalpy ulttyń dúniesi. Bul jerde jekelegen batyrlar men jekelegen handar jazyla bastady. Abylaihan týraly, Bógenbai batyr týraly romandar... Keiin Nesipbek Aituly poema janrynda batyrlardyń obrazyn jasady. Ol qazaq dalasyndaǵy batyrlardy bólip-jarǵan joq: Jalańtósten bastady, Qabanbai batyrǵa da, Bógenbai batyrǵa da, Naýryzbai batyrǵa da poema jazdy. Nesaǵamyzdiki endi kózge kórinetin dúnieler boldy. Odan basqa kózge kórinbei qalǵan avtorlar da boldy. Joldasbek Turlybaevtyń «Raiymbek» degen romany bar, mysaly... Endi osydan ádebiette árkim óz babasyn ulyqtady degen áńgime shyǵardyq. Ol zańdy da edi. Ol ýaqyttan ótýimiz kerek edi bárimizge. Sodan keiin qaisysy ádebiettiń tól jetistigi ekendigin ýaqyt jáne oqyrman ózi ylǵap alady.
- Sovet odaǵy kezinde aqyn, jazýshylar úlken qamqorlyq kórdi dedińiz. Qazir bizdiń elimizdiń ekonomikalyq jaǵdaiy jaman emes. Biraq, qazirgi kúnde sol kezdegidei qalamaqy tólenbeidi. Jas jazýshylarmen kezdessek, ylǵi osy máseleni kóteredi. Osy jaiynda oqyrmanǵa qandai bir tyń aqparat bere alasyz?
- Táýelsizdik ala qalǵan kezde bizde 1000 danamen kitap shyqpai qalǵan ýaqyttar boldy. Keiin memlekettik tapsyryspen shyǵatyn kitaptar 1000 danadan aspaityn. Qazir, táýbe, memlekettik tapsyryspen shyǵatyn kitaptar 5000 danaǵa jetti. Ýaqyt kerek boldy. Endi qalamaqy máselesine kelsek, shynymen de ol toqtap qaldy. Buryn gazet-jýrnalǵa jazǵan maqalasyna da qalamaqy alyp otyrǵan qalamgerlerdiń abdyraǵan kezi osy bolatyn. Ótkende Mádeniet jáne sport ministrligi Májiliske daiyndap jatqan Mádeniet týraly zańnyń ishinde ádebiet týraly bir sóz joq bolatyn. Aziia forýmynda Premer-Ministrdiń orynbasary Berdikbek Saparbaev aqyn, jazýshylardy qabyldady. Sonda úlken qalamgerler osy máseleni kóterdi. Buǵan deiin Mádeniet jáne sport ministrligi memlekettik tapsyryspen shyǵatyn kitaptyń avtorlyǵyn 40 jylǵa satyp alatyn bolǵan. Olar ár baspa tabaqqa 150 myń teńgeden qalamaqy beredi. Biraq avtorlyǵyn satyp alǵannan keiin sen ol kitapty 40 jyl boiy óziń shyǵara almaisyń. Bul Almatyda byltyr Jazýshylardyń sezinde de kóterildi. Osy dúnie qaitadan qarastyrylyp, memleket avtordyń shyǵarmasynyń avtorlyǵyn 40 jylǵa alyp qoiýdy doǵardy. Qazir zań Senatta qaralyp jatyr. Ádilet ministrliginiń mamandarymen de sóilesip, Mádeniet ministrligi bul zańdy jan-jaqty talqylap, kelisimge keldi. Mádeniet ministrligi avtordyń shyǵarmasyn alady, oǵan qalamaqy beredi, keiin shyǵarma shyqqansha sol vedomstvoda jatady. Baspadan shyǵyp, kitaphanalarǵa túskennen keiin avtor kitabyn qaitadan kommertsiialyq jolmen shyǵarýǵa ruqsat beriletin boldy.
- Jańaǵy 5000 danamen shyǵatyn eńbekterge toqtalsaq. Bul qalamy tóselgen, aǵa býyn qalamgerlerge ońtaily sekildi de, jastarǵa kele bermeitin sekildi. Jastar ár shyǵarmaǵa jeke qalamaqy tólenip tursa deidi. Bul bir jaǵynan yntalandyrý da bolar edi?
- Bul endi jeke jastarǵa dep bólek qarastyrylmaǵan. Myna máselege qarańyzshy, byltyr odaqtyń basshysy aýysqaly beri astanada úsh forým ótti. Soǵan sovet quramynda bolǵan elderdiń jazýshylary kelgen kezde táýbá dep ketti. Irgedegi Qyrǵyzstandy al, biz memlekettik tapsyryspen kitap shyǵaramyz, olarda qazir memlekettik tapsyrys ta joq. Sondyqtan biz bári birden bola qalmady deimiz. Jas qalamgerlerge degen jeke baǵdarlama joq. Negizinen, bul kóteriletin másele. Sodan keiin tek qana Mádeniet ministrliginiń qamqorlyǵy emes, qazir oblystar bul máseleni jeke-jeke qolǵa alyp jatyr. Bir nárseni túsinýimiz kerek, elordaǵa jastar jinaldy ǵoi. Rýhani ortalyq bolady, keiin úlkeiedi, biz osy jerde ómir súrgimiz keledi dep. Osylardyń árqaisysynyń óz týǵan jeri bar. Mysaly, byltyr Almaty oblysy 40 avtordyń kitabyn shyǵardy. Aqtóbe kitaphanasy 40 avtordyń kitabyn shyǵardy, onyń ishinde 10 jas aqynnyń kitaby shyqty. Bizdiń de osy maqsatta qalalyq ákimdikke joldaǵan jobamyz bolǵan, ol kelesi jyly júzege asyp qalar. Biyl ýaqyt tyǵyz bolyp ketti. «Mazdaq» degen seriiamen kitaby shyqpaǵan 29 jasqa deiingi 20 aqyn, jazýshynyń kitabyn shyǵaryp berýdi qalalyq ákimdikke joba retinde usynǵanbyz. Basynda maquldanyp edi, keiin qoldaý tappai qaldy. Óitkeni bizdiń Jazýshylar úiin ashýǵa onsyz da biraz áreket jasap jatqannan keiin biz tópeshtei almadyq. Biraq, bolyp qalatyn shyǵar dep otyrmyz...
- Bizdiń qazaq ádebietiniń ótkenine úńilsek, 20 ǵasyrdyń basynda ǵana proza janry paida bolǵan. Oǵan deiingi aýyz ádebietindegi jyrlarda, dastandarda ásireleý degen tásil kóp qoldanylady. Tipti, kóptegen shyǵarmalar qiial-ǵajaiypqa qurylǵan. Biraq qazir bizde «fentezi» janrynda jalpaq jurtqa keń taraǵan shyǵarma joq. Qiialǵa júirik bizdiń halyq nege óz tabiǵatyna jaqyn janrda kóshten qaldy? Osy janrda jazyp júrgender bar ma?
- Ádebiette qoǵamnyń ózgerisine, adamnyń sana-sezimine bailanysty neshe túrli eksperimentter jasalady. Mysaly, bir kezde jurt Asqar Súleimenovti onsha qabyldai almady ǵoi. Onyń kúrdeli sóilemderi jalpy oqyrmanǵa onsha túsiniksiz boldy. Keiin baryp Asqardy túsindi. Men qazir Eýraziia ulttyq ýniversitetinde ádebietten sabaq beremin. Biz oqý bitirgen kezde, 2000 jyldarǵa deiin, odan 2008-ge deiin sabaq bergen ýaqytta Asqar Súleimenov, Oralhan Bókeevter qazirgi tilmen aitqanda trendte boldy. Endi qazirgi stýdentterime Asqardy jelkelesem de oqytyp, túsindire almaimyn. Bul kórkem ádebietti qabyldaityn býynnyń almasyp ketýiniń kórinisi. Siz aityp otyrǵan qiial-ǵajaiyp dúnieler bizdiń aýyz ádebietimizde bolǵany ras. Biraq, álemdik naryqqa qazaq ádebieti shyǵýǵa áli de talpynystar kerek. Kóbirek eksperimentter kerek.
Raqymjan Otarbaevtyń ataqty suhbaty boldy ǵoi, «Abai jolyn» oqytýdyń qajeti joq, qazirgiler ony oqymaidy» degen. Raqań ony bilip aityp otyr. Qazir adamdardyń 4 tomdyq úlken shyǵarmalardy oqýǵa ýaqyty da joq jáne qabileti de jetpeidi, menińshe.
- Kez kelgen usynys suranysqa táýeldi. Bizdiń qoǵam neni suraidy, jazýshy sony berý kerek pe? Álde, óz biiginde jaza berý kerek pe?
- «Alaman» degen sóz bar qazaqta. 1927 jyly Halel Dosmuhamedovtiń halyq aýyz ádebietinen Mahambetterdi, Murat Móńkeulyn beretin kitabynyń aty – «Alaman». Alaman degen – tobyrlyq. Alaman báige deimiz. Mels Qosynbaevtyń aitysta aitatyny bar: «Aiqailap kelip qol soqqan, aǵaiyn myna — alaman» degen. Ol - tobyrdyń suranysy, tobyrdyń qýanyshy. Iaǵni, shoýlyq dúniege ákeletin nárse. Qoǵamnyń suranysy degen osyǵan ákeledi. Sol qoǵamnyń suraǵanyn ótep jatqan shoýlar bar qazir. «Ázil álemi» bar, «Jaidarman» bar. Keshirińiz, biraq ol kórkem dúnie emes. Kórkemdik degen – tereńdikte, kúrdelilikte. Sondyqtan, qoǵamnyń suranysyna barlyq aqyn, jazýshy eńkeiip bas ietin bolsa, rýhaniiatyńyz da, ádebietińiz de quldyraidy.
- Máskeýde nemese Peterbýrgte qoǵamdyq oryndarda biraz adamnyń kitap oqyp otyrǵanyn baiqaýǵa bolady. «Orys jazýshylary oqyrman qalaýymen sanasý arqyly oqyrmanyn qalyptastyrdy da, bizdiń jazýshylar óz stilinde jazamyn dep oqyrmanyn joǵaltyp aldy» degen pikir bar. Buǵan ne der edińiz?
- Men ol pikirge qarsymyn. Óitkeni aqyn, jazýshy, ras, oqyrmandy tárbieleidi. Biraq ol oqyrmannyń yqpalynda ketý emes. Oqyrmandy báribir ózine qarata bilý. Men siz aityp otyrǵan Máskeýde de, Túrkiiada da boldym. Bizge qaraǵanda qoǵamdyq oryndarda kitap oqyp turǵan adamdardy kóbirek kóresiń. Olardyń bári jahandanýǵa bizden erte jetken. Oǵan sál ýaqyt kerek dep oilaimyn.
Osy elordada ótetin Eýraziialyq halyqaralyq kitap kórmesi bar. Buiyrsa, biyl besinshi jyl ótedi. Buny memleket uiymdastyryp otyrǵan joq, bir baspanyń uiymdastyryp otyrǵan dúniesi. «Foliant» baspasynyń óz qarjysymen, óz josparymen ótkizip otyrǵan sharýasy. Ótkende Tashkentke de halyqaralyq kitap kórmesine baryp keldim. Sonda baiqaǵanym, bizge qaraǵanda ol jaqta kitapqa suranys kóbirek eken. Bul kitap kórmesin ne úshin ótkizedi? Aqsha tabý úshin emes, oqyrman tartý úshin. Kitap mádenietin kóterý úshin. Osyny bizdiń bilik qolyna alý kerek dep oilaimyn. Ondai jerge balalardy kúshtep ákelý kerek. Ata-anasymen kelip, ana kitapty alyp ber, myna kitapty alyp ber dep turǵan balalardy kórdik. Kórip, marqaiasyń. Biz kitap mádenietine osylai qaityp oralamyz.
- Damyǵan elderde jazýshy óz shyǵarmasynan orasan paida tabady. Tipti, dollarlyq millionerler shyǵyp jatyr. 2018 jyly Forbes eń joǵary qalamaqy alatyn jazýshylardyń tizimin shyǵarǵanda, birinshi orynda Djeims Patterson esimdi amerikalyq jazýshy turdy. Ol bir jylda 86 mln dollar tabys tapqan. Bizdiń jazýshylar aldaǵy ýaqytta óz shyǵarmashylyǵyn tabys kózine ainaldyrýy úshin búgin neni isteýimiz kerek?
- Bul jerde qazaq qalamgerleriniń jaǵdaiynyń túzelýi ózine bailanysty. Byltyr jazdygúni qalalyq ákimdikpen birlese qala kúnine orailastyryp «Eýraziia astanalarynyń qalamgerleri» degen forým ótkizdik. Sonda bir sektsiianyń taqyrybyn «Ádebi aýdarma jáne ádebi agentter» dep qoidyq.
- Ádebi agent degen kim?
- Ádebi agent — tamyr-tanystyǵyń. Juldyzdardyń prodiýsserleri bolatyny sekildi ádebi prodiýserler de bolýy kerek. Kezdesýdi uiymdastyrýǵa, kitaptaryńnyń aýdarmasyna bailanysty. Bul bizde áli jolǵa qoiylǵan joq. Ádebiet tanylýy úshin, avtor syrtqa ózin kórsete alýy úshin ol kerek nárse. Osy máseleni kóterip júrgen Almatyda Baqtygúl Mahambetova degen ápkemiz bar. Aǵylshynsha jaqsy biledi. Osyndai til biletin adamdardan jasaqtalý kerek ádebi agentter. Bizdiń memlekettiń qamqorlyǵyndaǵy Ulttyq aýdarma biýrosy - ol jalpy qazaq ádebietin aýdaryp, tanystyrýǵa áreket jasap jatqan uiym. Jekelegen avtorlar ózderi áreket jasap, ózderi agentterin taýyp, qarajatyn tabýy kerek. Dýlat Isabektiń shyǵarmalary shetelde shyǵyp jatty ǵoi, Didar Amantaidyń kitaptary shetelde shyqty, bunyń bári memlekettiń aqshasy emes. Sosyn bizdiń avtorlarda, qalamgerlerde salbókselik, boikúiezdik bar. «Men aqynmyn, men jazýshymyn, meni ákimdik, ministrlik izdep taýyp alsyn» degen oi bar.
- Qazirgi qazaq prozasyn alsaq, ol óziniń bir anyq baǵytyn tapty ma?
- Eksperimentaldy kezeńde turmyz dep oilaimyn. Mysaly, mistika janrynda Qoishybek Múbárak jaqsy dúnieler jazyp júr. Mistika janrynda táýekelge baryp júrgen kóp adamdy kóre almaisyń. Ekinshi - Maqsat Máliktiń shyǵarmalary qazirgi oqyrmanǵa qyzyqtyraq kórinedi. Esbolat Aidabosyn, Murat Almasbek, Yrysbek Dábei qalamdary qalyptasyp qalǵan jazýshylar der edim. Táýelsizdik jyldarynda aǵa býynnan keiingi lekte Asqar Altaidy aitýǵa bolady. «Sirat» degen romany bar. Osynyń kez kelgen bólimin alyńyz da, basyna qoiyp oqi berseńiz, túsinesiz. Osyndai bir formany ákelgen edi.
- Qazir keibir eńbekter bar: ádebiet deiin deseń kórkemdigi joq, ádebi týyndy emes deiin deseń, oqyrmany bar. Siz olardy ádebi shyǵarma dep aita alasyz ba? Mysaly, Michael Sherimbek-tiń «Júz» kitaby, estrada juldyzdarynyń shyǵaryp jatqan kitaptary bar. Bulardy qandai týyndy dep ataýǵa bolady?
- «Qazirgi zamanǵy sóz energiiasy» atty aldyńǵy jyly ótkizilgen forýmda Rasýl Jumaly qazirgi blogerlerdi de jazýshylardyń qataryna qosý kerek degen pikir aitty. Biz osyndai pikirdi nege aitqyzdyq? Óitkeni qazir kórkem prozada til qasańdap ketti. Kórkem ádebiette til jutańdanyp bara jatyr. Prozadaǵy kórkem tilge qazir men tushynbaimyn. Meili, Áýezovtiń, Qaliqan, Ábishtiń tilimen jaza almai-aq qoiaiyq. Jyldan jylǵa til jutańdana berse ne bolady? Aýyzeki sóileý tili kórkem ádebiet bola almaidy. Men jastarǵa ýniversitette sabaq beretin oqytýshy retinde de kóretin problemam osy. Prozada da sol, poeziiada da sol. Kórkem ádebiet tildiń qory, qormaly, qaimaǵy, máiegi. Sol úshin kórkem ádebiet kerek, onyń eń birinshi atqaratyn mindeti — tildi saqtaý. Al jańaǵy siz aityp otyrǵan adamdardyń kitabyn men ádebiet dep qabyldamaimyn. Keshirińiz, ol aradaǵy bir dúbara, dúdamal, dúregei dúnie. Baian Maqsatqyzynyń kitabyn oqityndar da, Ainur Tursynbaevanyń kitabyn oqityndar da, Láilá Sultanqyzynyń kitabyn oqityndar da, Maikl Sherimbektiń kitabyn oqityndar da kórkem ádebietti jete túsinip oqyǵan adamdar emes, olar – tyńdarmandar — qulaqpen qabyldaityndar. Onyń ishinen bireýdi maqtap, madaqtaýǵa, bireýdi aldap-arbaýǵa jeterlik tárbie alatyn shyǵar. Men odan kórkem ádebiet te, estetikalyq mán de kórip turǵan joqpyn.
- Áńgimeńizge rahmet!
