QR Ishki ister ministrligi balalardyń jazǵy jumysy jóninde oqýshylar men ata-analarǵa úndeý jasady, dep habarlaidy QazAqparat.
«Jazǵy demalys bastalysymen balalar ýaqytsha jumys izdei bastaidy. Muny esirtkini taratýshylar paidalanýy múmkin, olar túrli internet-platformalarda jumys oryndary týraly jarnama jasap, qomaqty qarajatpen qyzyqtyrady. Osyǵan bailanysty azamattardan óz balalaryn nazardan tys qaldyrmaýdy jáne baqylaý jasaýdy suraimyz. Balalarǵa mundai tabystyń qaýipti ekenin túsindirý kerek jáne jumys sipatyn teksermei, sait ákimshisi, kýrer bolyp jumys isteý usynystaryn qabyldamaý kerek. Esirtkiniń zańsyz ainalymyndaǵy qylmys qataryna áleýmettik jeli paraqshasynda ákimshi bolý, internette esirtki týraly aqparat taratý jáne tasymaldaý da kiredi», - dedi QR IIM baspasóz qyzmetiniń ókili Shuǵyla Turlybek ministrlik uiymdastyrǵan brifingte.
Zańnamaǵa sáikes, mundai qylmys úshin jaýapkershilik 16 jastan bastalady jáne 20 jylǵa deiin nemese ómir boiy bas bostandyǵynan aiyrý jazasy kózdelgen.
