Foto: baribar.kz
Jas bastalyp, stýdentter de oqýdan bosai bastady. Aldy úsh ai jaz, jastar qosymsha aqsha tabý úshin túrli jumysqa shyǵady. Elimizde stýdentter jazǵy demalys kezinde qandai jumys túrlerimen ainalysa alatynyn Ult.kz tilshisi anyqtap kórdi.
Stýdentter oqý barysynda jumys istei alady, biraq jumys ýaqyty oqý kestesine sai bolý kerek. Oqý ornynyń ruqsatyn alý qajet bolýy múmkin. Dýaldy bilim berý júiesi boiynsha oqityn stýdentter birinshi nemese ekinshi kýrsynan bastap mamandyǵymen jumys istei alady.
Al jaz mezgilinde «Jasyl El» baǵdarlamasy iske qosylady. 18 jasqa tolǵan stýdentter jazǵy demalys kezinde bul baǵdarlamaǵa qatysyp, qurylys, kógaldandyrý siiaqty jumystarǵa aralasa alady. Jalaqy kólemi 30 000–150 000 teńge aralyǵynda. Alaida kóp stýdent kúndelikti tabys ákeletin jumys istegisi keledi eken. Máselen:
Foto: businessmir.kz
Kýrerlik qyzmet: Kýrer bolyp jumys istep, kúnine 10 000 teńgeden astam tabys tabýǵa bolady. Repetitorlyq qyzmet: IELTS, SAT siiaqty pánder boiynsha repetitorlyq qyzmet kórsetý. Q.Sátbaev atyndaǵy QazUTÝ-dyń stýdenti Arqas Ádiletov biyl úshinshi jyl kýrerlik qyzmet kórsetedi. Tabysy da jaman emes.
«Iá, jaz body kýrer bolyp isteimin. Alǵashqy jyly qaladaǵy aqyly samokattardy minip tasitynmyn. Byltyr ózime moped satyp aldym, aqshamdy jinap. Biyl da kýrer bolyp bastadym. Stýdentke eshkim kóp aqsha bere qoimaidy. Ol úshin táýeldi bolmai, osylai jeke ózim tasyǵandy jón kóremin. Kúnine 25-30 myń teńgege deiin tabamyn. Osy jumysymnyń arqasynda qazir Almatynyń úlken kóshelerin de, kishkentai kóshelerin de jaqsy bilip aldym, kózimdi jumys turyp taýyp bara alamyn. Tabysyńnyń 15 paiyzyn tirkelgen kompaniia ustaidy, biraq sonyń ózinde óte jaqsy aqsha tabamyn dep oilaimyn. 19 jasymda aiyna 700-800 myń teńge taýyp otyrmyn. Bul meniń ózime tolyǵymen jetip, otbasymdy da arasynda qýantyp turýyma ábden jetedi», – deidi Arqas Ádiletov.
Sonymen qatar, qazir jastar kliningtik qyzmetter, iaǵni úi nemese keńse tazalaý qyzmetin de kórsetip júr. Qurylys jumystarynda kómekshi: Qurylys alańdarynda qara jumystardy atqarý. Meiramhanalarda qyzmet kórsetý: Daiashy, kassir, satýshy-konsýltant siiaqty jumystar da atqarady.
Foto: tasty-team.ru
Daiashy bolyp jumys bastaǵan Raiymbek Bedelbek Almaty qalasyndaǵy kóp salaly kolledjtiń stýdenti. Ol biyl alǵash ret eńbekke aralasyp jatyr eken.
«Biyl 16 jasqa tolstym. Buǵan deiin jasyń jetpeidi dep eshqandai jer jumysqa almaityn edi. Qazir jasyma sai jumys istei alamyn, ol úshin anam jumys isteýime qarsy emesin kórsetip, joldaǵy qaýipsizdigimdi óz jaýapkerlshiligine alǵan qolhat jazyp berdi. Alǵashqy jumysym bolǵandyqtan, daiashy bolýdan bastaiyn dep sheshtim. Ázirge eshqandai tájiribem joq, sondyqtan úlken jumystardy jaýapkershilikke alýǵa qoryqtym. Qazir eń basty maqsatym, jańa oqý jylyna otbasyma salmaq salmai ózim daiyndalý. Jastardyń, ásirese er azamattyń «óz qaltasy» bolǵany durys dep esepteimin», – deidi Raiymbek Bedelbek .
Negizi ár balanyń quqyǵy qorǵalady. Eńbek kodeksi boiynsha, 14 jastan asqan jastar jazǵy demalys kezinde jumys istei alady. Jumys ýaqyty men sharttary eńbek kodeksine sáikes bolýy tiis.
Aqbota Musabekqyzy
