Foto: primeminister.kz
QR Premer-Ministri Álihan Smaiylov Qaraǵandy oblysyndaǵy «ArselorMittal Temirtaý» AQ «Qazaqstan» shahtasynda apat saldarynan qaza tapqan shahterlerdiń otbasy múshelerimen kezdesip, aýrýhanada jatqan zardap shekken kenshilerge bardy, dep habarlaidy "Ult aqparat" primeminister.kz saityna silteme jasap.
Kezdesý barysynda Úkimet basshysy qaza tapqan kenshiler otbasylarynyń qaiǵylaryna ortaqtasyp, kóńil aitty.
«Sizderdiń orny tolmas qaiǵylaryńyzǵa ortaqpyz», — dedi Álihan Smaiylov.
Úkimet basshysy Memleket basshysynyń tapsyrmasy boiynsha shahtadaǵy apattyń sebepterin egjei-tegjeili zertteitin arnaiy komissiia qurylǵanyn atap ótti.
«Jaýapty tulǵalardyń barlyǵy tiisti túrde jazalanady. Ótken jyly da osyndai jaǵdai bolǵan. Ol kezde basshylyq barlyq qajetti sharany qabyldap, eńbek qaýipsizdigin qamtamasyz etýge, investitsiia salýǵa ýáde bergen edi. Biraq, kórip otyrǵanymyzdai, qaiǵyly oqiǵa qaitalanyp otyr, qajetti kólemde qarajat bólinbei otyr. Sondyqtan qazir bul kompaniianyń iesi boiynsha qandai shara qabyldanady degen suraq qoiyldy. Ótken qaiǵyly oqiǵalar boiynsha tergeý jumystary aiaqtalý ústinde. Qyrkúiek aiynda materialdar sotqa jiberilip, kináliler, onyń ishinde kompaniianyń top-menedjmenti jaýapqa tartylady dep kútilýde. Munyń sońyna jetetinimiz anyq», — dedi Premer-Ministr.
Kezdesý barysynda qaza tapqandardyń barlyǵynyń otbasyna memleket pen jumys berýshi qajetti qoldaý kórsetetini atap ótildi. Atap aitqanda, respýblikalyq biýdjetten asyraýshysynan aiyrylý jaǵdaiy boiynsha beriletin járdemaqy jáne Memlekettik áleýmettik saqtandyrý qorynan áleýmettik tólem qarastyrylǵan.
Sonymen qatar qaza tapqandardyń otbasyna jumys berýshi kenshilerdiń jyldyq jalaqysynyń 10 eselengen mólsherinde moraldyq ziian úshin birjolǵy ótemaqy tólep, sondai-aq jerleý jáne eske alý sharalaryn ótkizý shyǵyndaryn óteitin bolady.
Turǵyn úi bolmaǵan jaǵdaida Qaraǵandy oblysynda páter beriledi, sondai-aq balalardy joǵary oqý ornynda tegin oqytý qamtamasyz etiledi. Sonymen qatar kompaniia otbasy múshelerin jumysqa ornalastyrý jáne ipotekalyq nesielerdi óteý boiynsha sharalar qabyldaidy.
Osy mindettemelerdiń barlyǵyn oryndaý «ArselorMittal Temirtaý» AQ menshik iesi aýysqan jaǵdaida da jalǵasatyny belgilendi.
Premer-Ministr atap ótkendei, qazirgi ýaqytta «ArselorMittal Temirtaýda» halyqaralyq kompaniialardy tarta otyryp, ekologiialyq aýdit jáne ónerkásiptik qaýipsizdik aýditi aiaqtalýda. Olar qyrkúiek aiynda aiaqtalady dep kútilýde, nátijesinde tiisti sheshimder qabyldanady.
Kezdesý barysynda kenshiler úshin zeinetkerlik jasty tómendetý máselesi kóterildi. Álihan Smaiylov qazirgi ýaqytta shahterlerge erterek – 55 jastan bastap zeinetke shyǵýǵa múmkindik beretin zańnamalyq ózgerister engizilip jatqanyn aitty.
Sondai-aq Premer-Ministr Qaraǵandydaǵy professor H.J. Maqajanov atyndaǵy kópsalaly aýrýhanasyndaǵy zardap shekken kenshilerge bardy.
Kásiporyn shahterlerge eńbekke jaramsyzdyq kezeńinde ortasha eńbekaqynyń 100% mólsherinde tólem júrgizetini, dárilik zattardy tóleitini, sanatorii-kýrorttyq em beriletini jáne moraldyq ziian óteletini atap ótildi.
«Tezirek saýyǵyp, otbasylaryńyzǵa oralyńyzdar», — dedi Álihan Smaiylov.
