QR Memlekettik qyzmet isteri agenttiginiń tóraǵasy Anar Jaiylǵanova ministrlikterden jaýapty hatshylardyń qysqartylýyna qatysty pikir bildirdi, dep habarlaidy QazAqparat.
«Ministrlikterdegi jaýapty hatshylardyń jumysy memlekettik apparattyń turaqtylyǵyn qamtamasyz etip, bilik vartikalyn bekemdeitini, Prezident Ákimshiliginiń jeke vedomstvolarǵa baqylaýyn kúsheitip, ministerlerdi ákimshilik-kadrlyq jumystardan bosatyp, olardyń negizgi kúsh-qýatyn saiasi mańyzy bar isterge jumyldyrar dep kúttik. Sonymen birge jaýapty hatshylar institýtynyń negizgi tapsyrmasy – saiasi memlekettik qyzmetshiler aýysqan jaǵdaida memlekettik organdardyń kadrlarynyń saqtalýyn qamtamasyz etý edi. Alaida memlekettik qyzmettegi kareralyq modelge aýysýymen bul qural óziniń mańyzdylyǵyn joǵaltyp aldy», - dedi Anar Jaiylǵanova OKQ-da ótken baspasóz máslihatynda.
Onyń aitýynsha buryn jaýapty hatshylar Memleket basshysy Prezident Ákimshiliginiń usynýymen jáne Úkimet basshysynyń kelisimimen taǵaiyndalatyn.
«Normativti-quqyqtyq qujattarǵa ózgerister engizilgennen keiin ministrlikterdegi apparat basshylaryn ministrdiń ózi Prezident janyndaǵy kadrlyq saiasat jónindegi ulttyq komissiianyń kelisimimen taǵaiyndaityn boldy. Jaýapty hatshylar qysqartylǵannan keiin olardyń mindetteri apparat basshylaryna beriledi. Apparat basshylarynda «A» korpýsynyń mártebesi saqtalar degen oidamyz», - dedi agenttik basshysy.
Sonymen qatar Anar Jaiylǵanova jaýapty hatshylardy qysqartý memlekettik apparattyń jumysyna áser etpeitinin málim etti.
«Bul tapsyrmany oryndaý úshin agenttik zańnamalyq túzetýler paketin ázirledi. Ol osy jyldyń sońyna deiin qabyldanady», - dedi ol.
