Qostanai oblysynda «Jasyl el» memlekettik baǵdarlamasy aiasynda biýdjet qarajatyn jymqyrý áreketine tosqaýyl qoiyldy. Qylmystyq toptyń quramynda «Jasyl eldiń» oblystyq basshysy da bolǵan, dep habarlaidy Ult.kz tilshisi QazAqparat agenttigine silteme jasap.
«Ekonomikalyq tergeýler qyzmeti qalany abattandyrý men kógaldandyrý salasynda jastardy jumysqa turǵyzýǵa arnalǵanq ylmystyq jospardy áshkereledi. Tergeý málimetterine sáikes, qylmystyq toptyń quramynda Qostanai oblystyq «Jasyl el» filialynyń basshysy, sondai-aq tórt jeke kásiporynnyń jetekshisi bolǵan. Olar 2014-2016 jyldary aralyǵynda oidan shyǵarǵan adamdardyń atyna járdemaqy jazyp otyrdy. Sóitip, 16 mln teńgeni jymqyrýdy oilaǵan», - dedi Ekonomikalyq tergeýler departamentiniń profilaktikalyq jumys jáne baqylaý bóliminiń bastyǵy Arman Esembaev Astanada ótken baspasóz máslihatynda.
Aita keteiik, búgin QR Qarjy ministrliginiń Memlekettik kirister departamenti Ekonomikalyq tergeýler qyzmeti alty aida atqarylǵan jumys boiynsha esep berdi. Sońǵy alty aidyń ishinde ekonomikalyq qylmystar boiynsha memleketke kelgen shyǵyn 151,5 mlrd teńgeni qurady. Atalǵan qarjynyń bári áleýmettik baǵdarlamalarǵa arnalǵan bolatyn. Bul qarjyǵa shamamen 70 mektep turǵyzýǵa bolatyn edi. Al, shymkenttik sheneýnikter biýdjet aqshasyn jymqyrýdyń taǵy bir jolyn tapty. Sondai-aq, Qaraǵandy oblysynda júkti kelinshekter 70 mln teńgeni úptep ketken.
