Kórneki foto: NUR.KZ
Kásibin ashqysy keletin jastarǵa 2,5 paiyzdyq shaǵyn nesie naýryz aiynan bastap berilýi múmkin. Bul týraly Eńbek jáne halyqty áleýmettik qorǵaý ministrliginiń ókilderi aitty, dep habarlaidy Sputnik Qazaqstan.
Eńbek jáne halyqty áleýmettik qorǵaý ministrligi halyqty jumyspen qamtý departamentiniń direktory Asqar Niiazovtyń aitýynsha, shaǵyn nesie 21 jastan 35 jasqa deiingi adamdarǵa beriledi. Mikrokredit alý úshin azamat mindetti túrde jeke kásipker retinde tirkelgen bolýy kerek. Bul rette tirkeý merzimi 5 jyldan aspaýy shart.
"Biyl elimizde 5796 shaǵyn nesie berý josparlanyp otyr. Bul maqsatqa 29 milliard teńgege jýyq qarjy tartylǵan. Nesie Agrarlyq nesie korporatsiiasy arqyly beriledi. Qazir jergilikti biýdjetke qarajat aýdarý úshin kelisimsharttarǵa qol qoiý jumystary júrgizilip jatyr. Bul jumys aiaqtalǵan soń, Agrarlyq nesie korporatsiiasy men jergilikti ákimdikter ózara kelisimshart bekitedi. Keiin naýryz aiynda biz osy jumysty bastaimyz dep josparlap otyrmyz", - dedi Niiazov BAQ ókilderimen kezdesýde.
Mikrokredit 5 jylǵa beriledi, eger biznes aýyl sharýashylyǵymen, mysaly mal ósirýmen bailanysty bolsa, 7 jylǵa deiin beriledi.
Jastar 5 mln teńgege deiin shaǵyn nesie ala alady. Paiyzdyq mólsherlemesi – 2,5 protsent. Kepildik qoiý mindetti sanalady.
"Kepildik qoiý bizdiń talabymyz emes. Nesie 2,5 protsent bolsa da, ol qaitarylýǵa tiis qarajat, grant emes. Qaitarymy bolǵan soń, ony kepilsiz bere almaimyz. Zańnama talabyna sáikes, biýdjettik nesieleý kepildiksiz júrmeidi", - dep túsindirdi Eńbek jáne halyqty áleýmettik qorǵaý vitse-ministri Oljas Ordabaev.
Ol aýyldaǵy úi nemese arnaiy tehnika da kepil retinde qabyldana beretinin atap ótti. Kepil retinde otbasy músheleriniń, týystarynyń múlkin de kórsetýge bolady. Múlikti baǵalaý jumystaryn Agrarlyq nesie korporatsiiasy júrgizedi.
Sondai-aq shaǵyn nesie qala jastaryna da, aýyl jastaryna da beriledi. Biznes túri boiynsha da esh shekteý qoiylmaidy.
"Bizde qala, aýyl degen shekteý joq. Ekonomikalyq qyzmet, iaǵni kásip túrleri boiynsha da shekteý qoiylmaidy. Mindetimiz – jastardy barynsha qoldaý. Jumystardy aiaqtap qaldyq. Naýryz aiynda shaǵyn kreditterdi júzege asyrýdy bastaimyz dep oilaimyn", - dedi Ordabaev.
