Memleket Basshysy N.Á. Nazarbaevtyń «Bolashaqqa baǵdar: rýhani jańǵyrý» atty «Egemen Qazaqstan» gazetinde jariialanǵan maqalasy máni men mazmuny, mańyzy men maǵynasy qosa órilip, ózindik ómirsheńdigin kórsetken kólemdi týyndy bolǵany sózsiz. Tarihtyń tolqyndaryn tarazylaýdan bastalyp, ult bolmysyn barynsha baǵamdaýmen bailanysyp, memlekettik atqarýy tiis mindetterin mejelep bergen maqala bizdiń de tebirenýimizge túrtki boldy.
Qoǵamǵa qozǵaý salǵan Elbasy ultty uiystyrýǵa, keshegimizdi saralap, keleshegimizdi kemeldendirýge úndep, «ulttyq kodty» saqtap qalýdyń san alýan baǵytyn baiyptaityn tamasha týyndysyn tartý etti.
Maqalanyń «HHI ǵasyrdaǵy ulttyq sana» dep atalǵan alǵashqy taraýynda Nursultan Ábishuly jańa ǵasyrdyń talaptaryna tótep berý úshin ekonomikamyzdyń ál-aýqatyn arttyryp qana qoimai, sanany jańǵyrtýdyń birneshe ereksheligin alǵa tartty. Dálirek aitqanda, ulttyq qundylyqtarymyzdy ulyqtap, saltymyzdy saqtap, dástúrlerimizdi dáriptep, rýhani bailyqtarymyzdy abattandyrýǵa shaqyrdy. Jershildik sekildi jahandyq jańǵyrýdyń talaptarymen janaspaityn jaǵymsyz ádetterden arylyp, ysyrapshyldyqty ysyryp, yqylym zamannan qalyptasqan ymyragershilikti ydyratpaýdyń yńǵaiyn Egemen elge erkin tilmen taǵy bir márte jetkizdi.
Budan bólek, jastardy táýlik saiyn túrlengen tehnogoliialyq dáýirdiń qarqynynan qaimyqpai, bilim keńistiginde memleket usynǵan múmkindikterden qur qalmai, básekege qabilettilikti arttyrýǵa qaýqarly bolýyn da atap ótti. Bul – Elbasynyń ósietin óskeleń urpaqqa ónege etýiniń ólsheýsiz úlgisi degen sóz.
Memleket basshysy munymen qosa ǵasyrlar qoinaýynda qalyp, jyldar óte saiasi sebeptermen de sergeldeńge túsken «qazaq álipbiiniń» taǵdyryn da nazardan tys qaldyrǵan joq. Elbasy bul máseleni birneshe jyldan beri kóterip kele jatqanyn bilemiz. Desek te, maqaladan latyn qarpine kóshetin kezdiń kelgenin oqyǵanymyzda qatty qýandyq. Tipti, biylǵy jyldan bastap qazaq álipbiiniń jańa grafikadaǵy biryńǵai standartty nusqasyn qabyldaý kerektigi aitylyp, Úkimettiń iske kirisetinin de tilge tiek etilipti. Nátijesinde 2025 jylǵa qarai latyn álipbiine tolyqtai kóshý jospary da jariialanǵan. Osyndai quptarlyq isti jasotandyqtarmen qosa bizdiń barsha zamandastarymyz, qatarlastarymyz, jalpy jastar qaýymy qoldaidy dep oilaimyz.
Maqaladaǵy taǵy bir baǵdar – «Jańa gýmanitarlyq bilim. Qazaq tilindegi 100 jańa oqýlyq» jobasynyń qolǵa alynýy. Bul – álemdegi eń tańdaýly 100 oqýlyqty ártúrli tilderden qazaq tiline aýdarylýy degen sóz. Keide stýdentter qaýymymen kezdeskenimizde memlekettik tilderdegi oqýlyqtar sanynyń azdyǵyn alǵa tartýshy edi. Mine, endi olardyń da armandary oryndalar kúnniń alys emestigin ańǵardyq.
Patriotizmniń parasattylyǵyn paiymdaityn «Týǵan jer» baǵdarlamasynyń qolǵa alynatynyn aitqan Prezident adamzat balasy úshin qasterli uǵym sanalatyn «Týǵan jerdiń» qadir-qasietin saralai ótipti. Bul baǵdarlama óz kezeginde elimizdiń árbir aimaǵynda ótkennen syr shertetin kóne ǵimarattar men tarihi eskertkishterdi, mádeni nysandardy qalpyna keltirýdi, óńirlerde ólketaný, ekologiialyq tazartý jumystaryn júrgizýdi, aýyl aimaqty abattandyrýdy kózdeidi. Kásipkerler de, ziialy qaýym ókilderi de, shendi-shekpendiler de, jastar da týǵan jerlerine qamqorlyq tanytyp, janashyrlyqtyń jańasha úlgisin kórsetýleri qajet ekenin usynǵan Kóshbasshymyzdyń bastamasy qoldaýsyz qalmaýy qajet dep sanaimyz.
Sonymen qatar, Elbasynyń Táýelsizdik jyldarynda óz aqylymen, eńbegimen, bilimimen, darynymen oza shapqan azamattardyń «Qazaqstandaǵy 100 jańa esim» jobasyn júzege asyrý ideiasymen de tanysyp shyqtyq. Jasampazdyqtyń jarqyn jyldarynda jaqsylyqtyń janynan tabylǵan jandardyń bul jinaǵy jastarǵa da úlgili joba bolary aqiqat.
Dana halqymyzdyń «ÓZ ERIN ÓZ PERZENTI ESKERMESE, EL QAIDAN ALSYN TAÝYP KEMEŃGERDI?» degen qanatty sózi kóregendiliktiń kósh basyndaǵy Elbasymyz Nursultan Ábishuly Nazarbaevtai taý tulǵaǵa arnalyp aitylǵandai dep sózimizdi túidik.
Daniiar Súndetbaev
«Nur Otan» partiiasy janyndaǵy
«Jas Otan» Jastar qanatynyń tóraǵasy
