Jastar úshin Táýelsizdikten asqaq murat, asqan qundylyq bolmaýy tiis. Bul týraly «Biz - el patriotymyz» halyqaralyq jastar forýmynda QR Memlekettik hatshysy Qyrymbek Kósherbaev aitty, dep habarlaidy QazAqparat.
«Jastardyń búgingi alqaly jiyny Memlekettik rámizder kúnimen tuspa-tus kelýiniń simvoldyq máni bar oilaimyn. Memlekettik rámizder egemendiktiń mártebeli nyshany bolsa, jastar eldiktiń, kemel keleshektiń kepili. Sonymen birge búgingi forým bárimiz úshin qasterli de qasietti mereke – Táýelsizdiktiń 30 jyldyǵy aiasynda ótip otyr. Táýelsizdik biz úshin janymyzdy táý etip kelemiz. Táýelsizdik ata-babamyzdyń ǵasyrlar boiy ańsaǵan armany, bizdiń ulttyq ideiamyz. Sondyqtan el erteńi jastar úshin Táýelsizdikten asqaq murat, asqan qundylyq bolmaýy tiis», - dedi Memlekettik hatshy.
Osy rette Qyrymbek Kósherbaev kezinde Tuńǵysh Prezident – Elbasy Nursultan Nazarbaev: «Jas qazaqstandyq azamattar degenimiz - bul tek quqyq ǵana emes, birinshi kezekte óz, óziniń otbasy jáne bizdiń otanymyz úshin jaýapkershilik ekenin este ustaý kerek» dep aitqan sózin eske salyp ótti.
«Búginde halqymyzdyń 20 paiyzyn 14-pen 29 jas aralyǵyndaǵy jastar quraidy eken. Al balalar men jasóspirimderdi qosa esepteitin bolsaq, búgingi qazaqstandyqtardyń deni jastar ekenin kóremiz. Osy turǵydan alǵanda biz tarihy tereń, bolashaǵy jarqyn, boiyn jastyq jalyny sharpyǵan ultpyz deýge tolyq negiz bar. Endeshe, bardy baǵalap, joqty saralap, táýbemizden jańylmai, táýekelden taiynbai Táýelsizdik tasyn órge birge súireiik, qadirli jastar dostar!», - dedi ol.
