Jastar jahandanýdyń zamanaýi igilikterin boiyna sińire otyryp, ulttyq qundylyqtarymyzdy quldyratpaýy tiis. Bul týraly «Biz - el patriotymyz» halyqaralyq jastar forýmynda QR Memlekettik hatshysy Qyrymbek Kósherbaev aitty, dep habarlaidy QazAqparat.
«Memleket basshysy Qasym-Jomart Toqaev: «21 ǵasyrda Qazaqstandy biik belesterge sizder siiaqty bilimi ozyq, oiy ushqyr jastar bastaýy kerek» dep jastardyń aldyna aiqyn mindetterdi belgilep berdi. Prezident bizdiń elimizde jaýapty memleket, jaýapty qoǵam, jaýapty adam júiesi berik ornaýy kerek degen ustanymyn erekshe atap ótti. Jáne de memleketimiz búginde óz tarapynan ár salada kósh bastap, jetistikke jetip júrgen jastardy elge tanytyp, olarǵa qoldaý kórsetý is-sharalaryn júieli túrde júrgizip keledi. Joǵary intellekt saltanat qurǵan, aqyl-parasat áleýeti aldyńǵy qatarǵa shyqqan jańa dáýirde bul asa mańyzdy jumys», - dedi Qyrymbek Kósherbaev.
Osy rette ol elimizde «Rýhani jańǵyrý» baǵdarlamasyn Ulttyq jańǵyrý baǵdarlamasyna ainaldyrý boiynsha naqty is-sharalar qabyldanyp jatqandyǵyn eske salyp ótti.
«Bul jańǵyrýlar eń áýeli elimizdiń erteńgi keleshegi jastar úshin asa qajet. Sizder jańa syn-qaterlerge laiyqty jaýap bere otyryp, ulttyq qundylyqtarymyzdy qasterlep, olardy basty murattaryńyzǵa sai ornyqtyrýlaryńyz qajet. Mysalǵa, zertteýler kórsetip otyrǵandai, búgingi jastar dańǵaza toi-dýman men asyra ysyrapshyldyqty qalamaidy eken. Bul ne degen úrdis? Óitkeni, ata dinimizde, ulttyq dástúrimizde hákim Abai aitqandai, artyq maqtanysh, asta-tók ysyrapty igi ádepterdiń qataryna eshqashan jatqyzbaǵan. Sondyqtan jastar jahandanýdyń zamanaýi igilikterin boiyna sińire otyryp, ulttyq qundylyqtarymyzdy quldyratpaýy tiis», - dedi Qyrymbek Kósherbaev.
