Elimizde jastar saiasatyna qatysty máselelermen ainalysatyn 6 komitet quryldy. Bul týraly Memlekettik hatshysy Erlan Qarin málim etti, dep habarlaidy "Ult aqparat".
«Búgin Jastar saiasaty jónindegi keńestiń elordada turatyn múshelerimen kezdestim. Sondai-aq, ZOOM arqyly shetelde turyp jatqan áriptestermen áńgimelesip, ózekti máselelerdi talqyladyq. Keńestiń jańa quramy jýyrda jasaqtalǵanyna qaramastan, biraz jumysqa kirisip kettik.
Jumysty tiimdi uiymdastyrý úshin biz jastar saiasaty salasynyń mańyzdy baǵyttary boiynsha 6 komitet qurdyq. Atap aitqanda, bilim berý jáne ǵylym; media, kreativtilik jáne óner; ekologiia; múmkindigi shekteýli jastar; gender máseleleri, turǵyn úi, jumyspen qamtý jáne basqa da máseleler komitetteri quryldy», - dep jazdy ol áleýmettik jelidegi paraqshasynda.
Memlekettik hatshynyń aitýynsha, komitet músheleri sáýir-maýsym ailarynda memlekettik organ basshylarymen kezdesý ótkizýdi josparlap otyr.
«Keńes músheleri zań shyǵarý jumysyna atsalysa bastady. Keńestiń 15 múshesi «Memlekettik jastar saiasaty týraly» zań jobasy boiynsha qurylǵan jumys tobynyń quramyna kirdi.
Sondai-aq, olar volonterlik qyzmet, qaiyrymdylyq, úkimettik emes uiymdarǵa arnalǵan memlekettik áleýmettik tapsyrystar jáne granttar týraly zań jobalary boiynsha jumys toptaryna qatysýda.
Budan bólek, Keńes músheleri kiberbýlling týraly zań jobasynyń qoǵamda qyzý pikirtalas týdyrǵan normalaryn pysyqtap, ózgertýge atsalysty. Búgin Májilis depýtattary osy zań jobasyna Senat engizgen túzetýlerdi maquldady.
Keńestiń aldaǵy jumysy da óte qaýyrt. Onyń múshelerin jastarǵa qatysty mańyzdy baǵdarlamalyq qujattardy ázirleýge jumyldyrý josparlanyp otyr», - deidi Qarin.
