Búgin Ońtústik Qazaqstan oblysynyń ákimi J.Túimebaevtyń qatysýymen ákimdiktiń kezekti májilisi ótti, dep habarlaidy "Ult aqparat" OQO ákiminiń baspasóz qyzmetine silteme jasap.
Otyrys barysynda jastar saiasatynyń óńirde júzege asyrylýy men jer qoinaýyn paidalanýdyń zańdylyqtary qaraldy.
Kún tártibindegi birinshi másele boiynsha baiandama jasaǵan oblystyq Jastar saiasaty máseleleri jónindegi basqarmasy basshysy B.Narbekova Elbasynyń «Bolashaqqa baǵdar: rýhani jańǵyrý» baǵdarlamalyq maqalasyndaǵy Týǵan jer baǵdarlamasy aiasynda Astana qalasymen jáne Qaraǵandy, Jambyl, Qyzylorda oblystarynyń jastar saiasaty máseleleri basqarmalarymen eki jaqty memorandým túzilgenin málim etti.
Jastarǵa arnalǵan memlekettik baǵdarlamalardyń oryndalýynda da birqatar jetistikterdi atap ótken ol «Diplommen aýylǵa» baǵdarlamasy boiynsha osy jyly 80 maman baspanaly bolyp, 315 jas maman jumysqa ornalastyrylǵanyn aitty. Al ortasha jalaqysy 56 725 teńgeni quraityn «Jastar praktikasymen» 1120 jumys berýshi mekemege 3005 jas joldanǵanyn atap ótti. Budan bólek, basqarma basshysy statistikalyq málimetterdi habarlap, atqarylǵan jumystar men aldaǵy jumys josparyn baian etti.
Baiandamashyny muqiiat tyńdaǵan aimaq basshysy statistikalyq málimettermen daiyndalǵan baiandamanyń saldarynan arǵy jaǵyndaǵy adam taǵdyryn kóralmai otyrmyz dedi.
«Oblysta jastar sany 800 myńǵa jýyq, olardyń ishinde 65 myńnan astamy joǵarǵy oqý ornynda oqysa, kásiptik-tehnikalyq kolledjderde 70 855 stýdent bilim alady. Osy jastarymyzdyń arasyndaǵy quqyqbuzyshylyq pen ózine ózi qol jumsaý faktileri ósip otyr. Oryn alǵan jaǵdai, jastarǵa arnalyp ashylǵan krizistik ortalyqtyń jáne mektep janyndaǵy psiholog mamandardyń jumysynyń tiimsizdiginiń saldary men oblystyq telearnalarda jastar baǵytynda tárbielik maǵynasy bar qyzyqty baǵdarlamalardyń joqtyǵynyń daqatysy bar»,-dedi ákim.
Osyǵan orai, oblys ákimi jastarǵa arnalǵan intelektýaldyq debat oiyndary men arnaiy jastar baǵdarlamalaryn ázirleýdi tapsyrdy. Sonymen qosa J.Túimebaev eshbir oblysta bizdegi siiaqty 12 joǵarǵy oqý orny men kásiptik bilim beretin 90 kolledjdiń joq ekenin tilge tiek etip, osy rette biz búkil elimizdiń aimaǵyna úlgi bolýymyz qajet dep aitty.
Birinshi máseleni qorytyndylaǵan óńir basshysy jastar tárbiesine qatysty sala basshylaryna, onyń ishinde joǵarǵy oqý oryndary men kolledj direktorlaryna birqatar tapsyrmalar júktedi.
Endi atalǵan mekemeler quzyrly organdarmen birlesip, oblys boiynsha jastardyń qatysýymen qylmys kóp oryn alatyn oryndardyń tizimin jasaqtap, qylmystyń aldyn alý boiynsha naqty sharalar qabyldaýy kerek. Sonymen qatar, ákim oblystaǵy barlyq telearnalarda aptasyna bir ret jastar baǵdarlamasyn ashýdy jáne oblystyq jastar saiasaty máseleleri jónindegi basqarmasynyń «Jastar resýrstyq ortalyǵy» janynan jas kóshbasshylar mektebi qurylýyn júktedi. Al, «Serpin-2050» baǵdarlamasy aiasynda orta arnaýly oqý oryndaryna aýyl jastaryn tartýdy, oblys boiynsha qurylysy júrgizilip jatqan nysandarda turǵylyqty jumyssyz jastardy tartý boiynsha qala, aýdan ákimderimen birlesken sharalar qabyldaýdy, barlyq mádeniet úileri men klýbtarda jastarǵa arnalǵan úiirmeler ashýdy mindettedi.
OQO ákiminiń baspasóz qyzmeti
