Kóresini Qanat Aitbaevtan kórip bittim. Dimash týraly gazetke birdeńe bere qoiaiyn deseń: «Qoia tur...», «Uiat bolady...» dep dińkeletedi de turady.
Dimash Qytaidaǵy «Men ánshimin» baiqaýynan oralǵanda Senat tóraǵasy Qasym-Jomart Toqaev Qanat pen Svetany quttyqtap, jedelhat joldady. Sony esti sala, jata kep jabystym: «Gazetke bereiik...». «Jo-joq, ol — jeke, otbasymyzǵa kelgen dúnie ǵoi. Uiat bolady». Qanattan qaiyr bolmaǵasyn Svetany jaǵaladyq. «Qanat ursady...» dep azar da bezer boldy ol da. Aqyry áreń ilikti. Gazetimizdiń saityna jarq etkizdik. Basqa saittar ilip áketti. Jaqsy jańalyq qoi.
Qanat biraz kirjińdedi. Svetaǵa da sóilepti. Meili, qýyryp jese de, óz áieli, onda sharýam qansha?! «Esegim sýdan ótti», bastysy.
Sol qýanyshty kúnderdiń birinde dosymyz, Dimashtyń qytailyqtar túgel jattap alǵan «Umytylmas kún» atty ániniń sózin jazǵan Oral Baiseńgir ádemi usynys aitty. «Aqtóbede biyl birqatar áleýmettik nysandar iske qosylady ǵoi. Sonyń ishinde Jastar saraiy bar. Soǵan Dimashtyń aty berilse, qatyp keter edi, iá? Ái, jýrnalister, osy usynysymdy baspasózge jariialańdarshy». Jurt dý ete qaldy. Qanattan basqasy, árine. Ol baiaǵy «ánine» basty: «Shyǵarmaityndaryń joq. Uiat bolady». Astanadan, Qytaidan habarlasyp, álgi usynystyń gazetke shyǵyp ketpeýin qadaǵalaýmen boldy. Maǵan mátibi, áiteýir.
Menińshe, Oraldyń usynysy óte durys. Ári bizde buryn mundai tájiribe bar. Jańylyspasam, Qaraǵandyda, Óskemendegi sport sarailaryna olimpiada chempiondary Serik Sápiev pen Olga Shishiginanyń esimderi berildi. Al Aqtóbedegi sý jańa Jastar saraiyna 23 jasynda kúlli álemdi moiyndatqan Dimashtyń atyn berse, júzikke qas qondyrǵandai bop shyǵa kelmei me?! Qalai oilaisyzdar?
Baýyrjan Babajanulynyń feisbýktaǵy jazbasynan
