Beineý jastary úndeýin Prezident Qasym-Jomart Toqaev pen Úkimet basshysy Álihan Smaiylovqa jáne Mańǵystaý oblysynyń ákimi Nurlan Noǵaevqa joldady, dep habarlaidy Ulysmedia.kz.
Beineý jastarynyń talabyn áleýmettik jelide Áset Súleimenov atty azamat jariialady.
«Beineý selosy Sultan Beibarys kóshesinde ornalasqan Loto klýbynyń oiyn avtomattary arqyly zańsyz biznes uiymdastyryp, aýyl turǵyndaryn qumar oiyndarǵa qyzyqtyryp, kóptegen otbasyny qaryzǵa belsheden batyrýda. Osyndai qumar oiyndardyń saldarynan el ishinde jas otbasylardyń aiyrylysýy, óz-ózderine qol jumsaý jáne taǵy da basqa qylmystar oryn alyp jatyr. Osylardyń aldyn alý úshin Beineý aýdanynyń ishki ister bólimine Loto klýby arqyly bireýler zańsyz kásippen ainalysyp jatqany týraly videodálelder tapsyryldy. Alaida osy kúnge deiin quzyrly organdardan eshqandai sheshim alǵan joqpyz», - deidi úndeýdi video arqyly oqyǵan jastar.
Beineý jastary bas prokýratýraǵa, sybailas jemqorlyqqa qarsy is-qimyl agenttigine jáne ishki ister ministrligine de ótinish joldaǵan. Alaida quzyrly mekemelerden eshqandai jaýap kelmegen.
«Biz Beineý aýdanynyń bir top jastary, zańsyz kásipkerlikpen ainalysyp otyrǵan Loto klýbynyń jabylýyn talap etemiz! Jabylsyn!» - deidi jastar.
Aita ketsek, Beineýdegi dál osy oiyn klýbyn birneshe ai buryn qumar oiyndarǵa berilgen bir jigit órtep jibergen bolatyn. Órtengen klýbtyń videosy áleýmettik jelide sol tusta kóp taralyp ketken. Alaida órtengenine qaramastan, klýb qaitadan ashylǵan.
