Jastar kásipkerligi jumyssyzdyqty joiýǵa septigin tigizedi. Mundai pikirdi búgin Úkimet úiindegi baspasóz máslihatynda QR Aqparat jáne qoǵamdyq damý vitse-ministri Juldyz Omarbekova bildirdi, dep habarlaidy QazAqparat tilshisi.
«Jumyspen qamtamasyz etý bizdiń negizgi mindetimiz sanalady. Biz málimetter bazasyn yqpaldastyrdyq. Esterińizde bolsa, barlyq stýdentterden jumysqa ornalasqany týraly anyqtama suralatyn. Bul jalǵan edi. Endi bul jalǵan emes. Eki málimetter bazasy yqpaldastyrylǵan jáne biz áleýmettik tólemderge sáikes onyń jumysqa ornalasqanyn ne ornalaspaǵandyǵyn kórip otyramyz. Barlyq túlekterdiń 63 paiyzy jumys isteidi. Aldaǵy ýaqytta munyń arta túserine úmittenip otyrmyz», - dedi ol.
Juldyz Omarbekovanyń atap ótýinshe, Qazaqstanda jumyssyzdyq deńgeii óte tómen.
«Qazaqstanda jumyssyzdyq joq degende kópshiligi «men she, jumssyz júrmin ǵoi» dep kúledi. Negizinde Qazaqstanda jumyssyzdyq joq. Iaǵni, Almaty naryǵynda bar mamandyqtardyń ózinde jastar arasyndaǵy jumyssyzdyq 6,4 paiyzdy quraidy. Alaida, ol jerde 12 myń bos jumys orny tirkelse, jumyssyz retinde tirkelgenderdiń sany 11 myń adamǵa jetip otyr. Demek bos jumys orny jumyssyzdardan kóp degen sóz jáne bul basty problema bolyp tur. Eńbek naryǵy usynatyn jumystardyń jalaqysy tómen bolǵandyqtar oǵan jastar barmaidy. Problemany sheshý kilti - bul jastar kásipkerligi», - dedi vitse-ministr.
Osy oraida ol 2019 jyly óz binesin bastaýǵa beriletin granttardyń sany artqandyǵyn aitty.
«Bul - jas ǵalymdarǵa arnalǵan ǵylymi granttar, sonymen qatar Eńbek jáne halyqty áleýmettik qorǵaý ministrligi tarapynan árbir azamattyń óz isin ashýy úshin kásipkerlik salasyna bólinetin granttar. Sonymen qatar belsendi jastarǵa biyl Azamattyq bastamalardy qoldaý ortalyǵy aiasynda shamamen 2 mlrd teńge bólinip otyr. Sondyqtan jastardy barlyq memlekettik baǵdarlamalarǵa belsendi qatysýǵa shaqyramyn», - dedi J.Omarbekova.
