.jpg)
Foto: ashyq derekkóz
2025 jyldyń 20 maýsymynda QR Prezidenti janyndaǵy Áielder isteri jáne otbasylyq-demografiialyq saiasat jónindegi ulttyq komissiianyń otyrysy ótip, onda jasóspirimder arasyndaǵy erte júktiliktiń aldyn alý máseleleri talqylandy, dep habarlaidy Ult.kz.
Jiyn barysynda bul máseleniń áleýmettik mańyzy zor ekeni atap ótilip, jańa profilaktikalyq strategiiany ázirleý týraly sheshim qabyldandy.
Otyrysty Ulttyq komissiia tóraǵasy, Qazaqstan Respýblikasynyń Mádeniet jáne aqparat ministri Aida Balaeva ashyp, jastardyń reprodýktivti densaýlyǵyn saqtaý jáne erte júktiliktiń aldyn alý máseleleriniń ózektiligin atap ótti. Onyń aitýynsha, jasóspirimder men jastardyń jynystyq jáne reprodýktivti saýattylyq deńgeiiniń tómendigi alańdatarlyq jait.
Jańa quram jáne basty máseleler
Otyrys Ulttyq komissiianyń jańartylǵan quramymen ótti, oǵan qoǵam qairatkerleri, sarapshylar men ǵalymdar qatarynan 8 jańa múshe endi. Sonymen qatar, Ulttyq komissiia tóraǵasynyń jańa orynbasary bolyp Aiman Omarova taǵaiyndaldy. Jiynnyń negizgi kún tártibinde jasóspirimder arasyndaǵy erte júktiliktiń aldyn alý sharalary men reprodýktivti densaýlyq aptalyǵynyń qorytyndylary sóz boldy.
Densaýlyq saqtaý ministrliginiń usynystary
QR Densaýlyq saqtaý ministri Aqmaral Álnazarova jasóspirimder arasyndaǵy júktilik pen jasandy túsik jasatý kórsetkishiniń joǵary ekenin málimdedi. Ministrlik balalarǵa ginekologiialyq kómekti jetildirýge baǵyttalǵan 2023-2025 jyldarǵa arnalǵan Jol kartasyn jáne balalarǵa profilaktikalyq kómekti jaqsartý jónindegi is-sharalar josparyn qabyldaǵan. Jospar aiasynda kontratseptivterge qoljetimdilikti arttyrý, aqparattyq túsindirý jumystaryn júrgizý jáne kadr áleýetin kúsheitý kózdelgen.
Balalardyń quqyqtaryn qorǵaý komitetiniń tóraǵasy Nasymjan Ospanova bilim berý júiesindegi jynystyq tárbie men túsindirý jumystarynyń barysy týraly aqparat berdi. Ulttyq komissiia tóraǵasynyń orynbasary Juldyzai Ysqaqova jastar arasynda densaýlyq pen bolashaq ata-ana bolýdyń jaýapkershiligine qatysty keń aýqymdy aǵartýshylyq naýqandardyń mańyzyn atap ótti.
Jańa strategiia jáne aldaǵy josparlar
Otyrysty qorytyndylaǵan Aida Balaeva erte júktilik pen bosaný máselesiniń Qazaqstanda áli de ózekti ekenin aityp, profilaktikalyq jumystardy jasóspirimderdiń jynystyq minez-qulyq erekshelikterin eskere otyryp, kópqyrly tásildermen júrgizý qajettigin atap ótti.
Jiyn barysynda jasóspirimder men jastar arasynda erte júktilik, jynystyq jolmen beriletin aýrýlar jáne reprodýktivti densaýlyqqa tónetin qaýipter týraly aqparattandyrý deńgeiin arttyrýǵa, sondai-aq salaýatty ómir saltyn nasihattaýǵa baǵyttalǵan jańa profilaktikalyq strategiiany ázirleý týraly sheshim qabyldandy.
Ulttyq komissiia tóraǵasy mektep oqýshylary men stýdentterdiń jynystyq tárbiesin arttyrý maqsatynda jasóspilimder men jastarǵa arnalǵan mobildi qosymsha ázirleýdi tapsyrdy. Sondai-aq, jasóspirimder arasyndaǵy júktilik deńgeii joǵary óńirlerde jyl boiy kóshpeli seminarlar ótkizý josparlanýda.
Ýákiletti memlekettik organdarǵa jastar densaýlyǵy ortalyqtarynyń jumysyn qaita qarap, qyzmetti jańartý jáne halyq arasynda salaýatty ómir saltyn keńinen nasihattaý usynyldy. Kezdesýge qatysýshylar óńirlik deńgeide vedomstvoaralyq bailanysty kúsheitýdiń jáne Otbasyny qoldaý ortalyqtarynyń jumys tiimdiligin arttyrýdyń mańyzyn atap ótti.
Ulttyq komissiia músheleri men Densaýlyq saqtaý ministrligi birlesip, jýrnalisterge arnalǵan usynymdar ázirleidi jáne «Analar saýlyǵy» baǵdarlamasyn zerdelep, ony iske asyrý joldaryn jetildirý boiynsha usynymdar daiyndaidy.
