Elordada jasóspirimderdiń uialy telefondaryn tartyp alyp kelgen buzaqy ustaldy, dep habarlaidy QazAqparat.
Nur-Sultan qalalyq Politsiia departamentiniń málimetinshe, «102» arnasyna Syǵanaq kóshesindegi úidiń kireberisinde belgisiz bireýdiń kámelettik jasqa tolmaǵan balanyń uialy telefonyn tartyp alǵany týraly habarlama túsken. Jedel-izdestirý is-sharalarynyń nátijesinde Saýran kóshesindegi úidiń aýlasynda kúdikti ustalyp, tergeý úshin «Esil» aýdanynyń politsiia bólimine jetkizilgen.
«Tekserý barysynda ustalǵan 27 jastaǵy azamattyń elorda aýmaǵynda bir táýlik buryn jasalǵan eki tonaý faktisine qatysy bar ekeni anyqtaldy. Buzaqy Saýran kóshesindegi úidiń boiynda kámeletke tolmaǵan jasóspirimnen «Samsýng» markaly uialy telefonyn ashyq túrde tartyp alǵan. Sodan keiin ol dál sol úidiń aýlasynda 11 jasar balanyń da «Samsýng» markaly uialy telefonyn alyp ketken», - dep atap ótedi departamentten.
Taratylǵan málimetke qaraǵanda, kúdikti uialy telefondardy satyp úlgergen. Atalǵan fakti boiynsha QR QK-niń 191-babyna sáikes sotqa deiingi tergeý júrgizilýde. Ustalǵan adam ýaqytsha oqshaýlaǵyshqa qamaldy.
«Osy jyldyń 10 aiynda elorda aýmaǵynda 185 tonaý oqiǵasy oryn alsa, onyń ishinde altaýy kámelettik jasqa tolmaǵandarǵa qatysty. Barlyq qylmys izi sýymai ashyldy», - dedi Nur-Sultan qalasy PD Kriminaldyq politsiia basqarmasynyń bastyǵy Dmitrii Demidov.
