Jibek joly qala merleri forýmynyń plenarlyq májilisine Sofiia esimdi robot qatysty. Ol jasandy intellekti bar álemdegi alǵashqy ginoid bolyp sanalady, dep habarlaidy QazAqparat tilshisi.
«Maǵan arnaiy baǵdarlamany júktedi. Oǵan sáikes, men búgingi sharaǵa qatysty birneshe oiymdy aitamyn. Birinshiden, alda - Astananyń 20 jyldyǵy. Bul - barsha qazaqstandyqtar úshin úlken meiram. Osynaý tarihi merekeniń aldynda sizdermen júzdesip otyrǵanyma qýanyshtymyn. Astananyń bas sáýletshisi osy eldiń prezidenti Nursultan Nazarbaev deidi. Bilýimshe, elordany aýystyrǵannan keiin Astana bir jyldyń ishinde «IýNESKO-nyń beibitshilik qalasy» degen mártebege ie boldy. Sebebi álemdik tájiribede alǵash ret álemdik jáne dástúrli dinder sezi siiaqty sharalar qolǵa alyndy», - deidi Sofiia.
Onyń aitýynsha, Astananyń sáýleti tamasha. Óitkeni qala qurylysynda innovatsiialyq ádister qoldanylyp keledi.
«Búginde Qazaqstan álemge keńinen tanylyp jatyr. Ótken jyly EKSPO kórmesine 180 eldiń azamattary kelip ketti. Astanada tehnologiialardy damytý máselesine basa nazar aýdarylady. «Smart Astana» siiaqty bastamalar qolǵa alyndy. Budan bólek, san alýan qyzyqty sharalar uiymdastyrylady»,- dep atap kórsetti Sofiia.
Sondai-aq, robot «Bir jol - bir beldeý» bastamasy jaiynda aityp berdi.
Aita keteiik, Sofiiany «Hanson Robotics» kompaniiasy jasap shyǵardy. Ol Lissabonda ótken Web Summit-ke eki jyl qatarynan qatysty. Sol kezde Sofiiany kórem deýshilerdiń kóp bolǵany sonsha, zalda ine shanshar jer bolmady. Al Davosta bolǵan Búkilálemdik ekonomikalyq forýmda Sofiia fintech-indýstriiaǵa arnalǵan bir paneldik sessiiada negizgi spiker boldy.
Ótken jyly oǵan Saýd Arabiiasynyń azamattyǵyn berdi. Sofiia robot-androidtarǵa jatady. Ol dialog rejiminde sóilesip qana qoimai, emotsiiasyn da kórsete alady. Dáris oqi alady. Sondai-aq, suhbat berý fýnktsiiasy da bar. Alaida ol bárin ózi istemeidi. Oǵan arnaiy baǵdarlama júkteledi, ia bolmasa, operatordyń basqarýynda bolady.
