QR IIDM qazaqstandyq jas otbasylarǵa páter satyp alýǵa múmkindik beretin memlekettik qoldaýdyń jeńildikti sharttaryn aityp, qoldanystaǵy jáne ákimdikter ázirleitin turǵyn úi baǵdarlamalary týraly habardar etti, dep jazady QazAqparat.
Qoldanystaǵy «Nurly jer» turǵyn úi-kommýnaldyq damý memlekettik baǵdarlamasy aiasynda «Otbasy bank» AQ arqyly jyldyq 2% jeńildikpen nesie berý kózdelgen. Nysanaly top – kezekte turǵandar, atap aitqanda, kópbalaly, tolyq emes otbasylar jáne múgedek balalary bar januialar.
Búginge deiin atalǵan baǵdarlama boiynsha tabysy tómen sanattaǵy 9443 otbasy baspanaly boldy.
Kezekte turǵan taǵy 17 myńynda «5-10-20» memlekettik baǵdarlamasy boiynsha páter satyp alýǵa qaryz alý múmkindigi bar. Olar turǵyn úi qunynyń 10% bastapqy jarnasyn tólep, 5%-ben 20 jylǵa deiin nesie ala alady.
Bul maqsatqa Prezident Qasym-Jomart Toqaevtyń tapsyrmasy boiynsha 210 mlrd teńge bólingen bolatyn. Atalǵan baǵdarlama boiynsha 9 699 otbasy páter satyp alýǵa nesie rásimdegen.
2020 jyldyń shildesinde bank jas otbasylarǵa arnalǵan «Jas otbasy» atty óziniń turaqty baǵdarlamasyn iske qosty. Bastapqy jáne qaitalama naryqtarda turǵyn úi, sondai-aq óz úiin salý úshin jer ýchaskesin satyp alý úshin qaryzdar jyldyq 6%-ben beriledi. Al 2 jyl ótisimen mólsherleme 5%-ǵa deiin tómendeidi. Nesieleý merzimi 6 jyldan 9 jylǵa deiin.
Bul baǵdarlamada erli-zaiyptylardyń jasyna jáne otbasyndaǵy balalardyń sanyna eshqandai shekteýler joq. «Jas otbasy» boiynsha qaryz alýdyń negizgi kriteriileri: nekede 3 jyldan 5 jylǵa deiin tirkelý, «Otbasy bankte» depozittiń bolýy (ashylýy), turǵyn úi qunynyń 50%-yn jinaqtaý. Sondai-aq, satyp alynatyn turǵyn úi somasynyń 50%-yn bir mezgilde salǵan kezde jeńildikti qaryz alý múmkindigi bar.
