Jambyl oblysynyń ákimi Berdibek Saparbaev qazirgi ýaqytta Taraz mańyndaǵy jarylystar toqtaǵanyn jáne turǵyndarǵa úiine qaitýǵa bolatynyn aitty, - dep habarlaidy Tengrinews.kz.
Saparbaev Jambyl oblysy Baizaq aýdanynda jarylys saldaryn joiý, keltirilgen zalaldy anyqtaý jáne qalpyna keltirý jumystary júrgizilip jatqanyn aitty. Ákimniń aitýynsha, barlyq memlekettik organ ókilderinen aimaqtyq jedel-shtab qurylǵan. Jarylys bolǵan jerge jaqyn mańda úsh aýyl bar.
"Eń jaqyny Qainar aýyly bir shaqyrym jerde ornalasqan. Qalǵan ekeýi bes shaqyrym qashyqta. Bul eldi mekenderdiń barlyq turǵyny arnaiy daiyndalǵan 10 mektep pen bes kolledj jataqhanasyna ornalastyryldy. Qazirgi ýaqytta munda 227 adam qaldy, olardyń kópshiligi týystaryna ketti. Qalpyna keltirý jumystaryna 1000-nan asa adam men 120-ǵa jýyq tehnika jumyldyryldy", - dedi ákim.
Saparbaev evakýatsiialanǵandarmen de kezdesti. Ol turǵyndar qajettiniń bárimen qamtamasyz etilgenin, sonyń ishinde sýsyndar, ystyq tamaq uiymdastyrylǵanyn aitty. Ákimniń aitýynsha, qazirgi ýaqytta jarylystar toqtaǵan, turǵyndar úilerine qaita alady.
Ákim temirjol qozǵalysyn qalpyna keltirý boiynsha jumystar júrgizilip jatqanyn da aitty. Oqiǵa ornynda saperler relsterdi snariadtardyń yqtimal bólikterinen tazartý jumystaryn júrgizip jatyr.
"Memleket basshysynyń tapsyrmasyna sáikes zardap shekken barlyq adamǵa kómek kórsetiledi. Zańǵa sáikes, qaza bolǵandardyń otbasyna memleketten kómek beriledi. Eger zardap shekkenderdiń arasynda múmkindigi shekteýli jandar bolsa jáne t.b. normaǵa sáikes kómek kórsetiledi. Qiraǵan úiler men nysandarǵa keletin bolsaq, sarapshylar úsh eldi mekendi aralap shyqty, órtengen úiler men basqa da nysandar tirkelmegen. Tek shatyrlar, terezeler, esikter synǵan", - dedi ákim.
Saparbaev turǵyndarǵa kómek kórsetý boiynsha sheshimder zańǵa sáikes, qiraǵan ǵimarattardy arnaiy komissiia tekserýi negizinde qabyldanatynyn aitty.
Buǵan deiin Jambyl oblysyndaǵy jarylystardan qaza tapqandar sany 9-ǵa jetkeni aitylǵan bolatyn.
Eske salaiyq, Jambyl oblysy Baizaq aýdanynda ornalasqan áskeri bólimde saǵat 19.00 shamasynda qoimalardyń biriniń janynda órt shyqqan. Órt saldarynan anyqtalmaǵan zattar jarylǵan. Jaqyn mańdaǵy turǵyndar evakýatsiialanǵany anyqtaldy.
