Jambyl oblysyndaǵy jarylys bolǵan oq-dári qoimasynyń ornynda tars etken dybys estildi, dep habarlaidy "Ult aqparat" Qorǵanys ministrligine silteme jasap.
«26 tamyz kúni órtengen injenerlik oq-dári qoimasynyń aýmaǵynda búgin, 29 tamyz kúni 12:20 shamasynda tars etken jalyn oryn aldy. Qurbandar men zardap shekkender joq, oqiǵa ornynda eshkim bolmaǵan. Qazir oqiǵanyń sebepteri anyqtalyp jatyr», delingen resmi túsinikteme.
Aita keteiik, qaiǵyly oqiǵa 26 tamyz keshki jetiler shamasynda boldy. Jambyl oblysy Baizaq aýdanynda áskeri bólim qoimalarynyń birinde órt shyǵyp, artynsha onnan astam jarylys boldy. Belgili bolǵandai, qoimada injenerlik oq-dári saqtalǵan. Qorǵanys ministri Nurlan Ermekbaevtyń aitýynsha, órt trotil saqtalǵan qoimadan bastalǵan.
Sońǵy málimet boiynsha oq-dári qoimasyndaǵy jarylystan 13 adam qaza tapty. Olardyń arasynda áskeri qyzmetshiler, órt sóndirýshiler, qutqarýshylar, áskeri prokýror bar. Taǵy úsh adam izdestirilip jatyr.
Búgin, 29 tamyz Qazaqstanda Jalpyulttyq aza tutý kúni bolyp jariialandy. Prezident Qasym-Jomart Toqaev áskeri jáne qyzmettik boryshyn atqarýda kórsetken erligi men janqiiarlyǵy úshin Jambyl oblysynda áskeri qoimadaǵy jarylystan qaza tapqan azamattardy memlekettik nagradamen marapattady.
