Aǵymdaǵy jyldyń birinshi jartyjyldyǵynyń qorytyndysy boiynsha elimizdiń kómir óndirýshi kompaniialary 53,0 mln tonna kómir óndirdi, bul ótken jyldyń sáikes kezeńimen salystyrǵanda 2,9% - ǵa artyq, dep habarlaidy "Ult aqparat" QR Indýstriia jáne infraqurylymdyq damý ministrliginiń baspasóz qyzmetine silteme jasap.
Esterińizge sala keteiik, biyl Qazaqstanda 120 mln tonna kómir óndirý josparlanǵan. Osylaisha eldiń ishki naryǵyna 82 mln tonna, eksportqa 38 mln tonna kómir jetkiziletin bolady. Sondai-aq, Ýkraina baǵytynda 80 myń tonnaǵa jáne QHR baǵytynda 50 myń tonnaǵa jetkizý kólemin ulǵaitý máseleleri pysyqtalýda.
Búginde Ministrlik ákimdikterdiń derekteri negizinde 2020-2021 jyldarǵa kommýnaldyq-turmystyq úshin jáne halyqqa arnalǵan kómir ónimderine qajettilik josparyn qalyptastyrdy. Osy josparǵa sáikes tutyný kólemi 10 mln tonnany quraidy, onyń ishinde kommýnaldyq-turmystyq sektorǵa-2,8 mln tonna, halyqqa – 7,2 mln tonna.
Budan bólek, kómir salasyndaǵy áleýmettik jáne eńbek qatynastaryn retteý maqsatynda salalyq kásipodaqtar jáne QR kómir salasy uiymdarynyń jumys berýshileri arasynda Salalyq komissiia quryldy. Qazirgi ýaqytta 2021-2023 jyldarǵa arnalǵan salalyq úsh jaqty kelisim ázirlenýde.
Sonymen qatar, búginde 2019-2021 jyldarǵa arnalǵan Qazaqstan Respýblikasynyń kómir salasyn damytý boiynsha Jol kartasyn iske asyrý jumystary jalǵasýda. Atalǵan baǵdarlama salany qoldaýdyń júieli sharalaryn qabyldaý jáne jańa jobalardy engizý jónindegi is-sharalardy qamtidy.
Iri jobalardyń biri - «Bogatyr» razrezindegi kómir óndirýdiń tsikldi-tolassyz tehnologiiasy, ol kásiporynnyń óndiristik qýatyn jylyna 42 mln tonnadan 48 mln tonnaǵa deiin arttyrýǵa múmkindik beredi. Jańa tehnologiia ónimniń sapalyq sipattamalaryn jaqsartady, kómirdi temir jol vagondaryna tieýdiń salmaqty dáldigin qamtamasyz etedi jáne kómir tieitin vagondardyń ainalym ýaqytyn úsh esege qysqartady.
Aita ketý kerek, jobanyń tiimdiligin arttyrý úshin sheteldik qarjy institýttarynyń qarajatyn tartý josparlanǵan, osylaisha jobanyń halyqaralyq deńgeidegi mańyzdylyǵy artady. Kómir óndirýdiń jańa biregei jabdyqtary men tehnologiialary engizilýde, bul innovatsiialyq quramdas bólikti aiqyndaidy, sondai-aq taý jynysyn qimalardyń ishine ornalastyrý josparlanýyna bailanysty kómir óndirýdiń qorshaǵan ortaǵa teris áserin barynsha azaitýdy kózdeidi.
