Qazaqstanda qańtar-sáýir ailarynda 113 myń otbasydaǵy 586 myńǵa jýyq adamǵa jalpy somasy 19,6 mlrd teńgege ataýly áleýmettik kómek tólendi, - dep habarlaidy Eńbek jáne halyqty áleýmettik qorǵaý ministrliginiń baspasóz qyzmeti.
586 myń adamnyń 561 myńy tótenshe jaǵdai kezinde memlekettik instantsiialarǵa júginbei, II toqsanda AÁK-ti avtomatty túrde aldy, 25 myń adam AÁK alý úshin alǵash ret júgindi.
«Járdemaqy eń aldymen quramy, turǵylyqty mekenjaiy jáne tabys deńgeii ózgermegen otbasylarǵa taǵaiyndaldy. Ol úshin aqparattyq júielerden alýshylardyń derekterin tekserý júzege asyryldy, atap aitqanda, turǵylyqty jeri boiynsha tirkelýi, jyljymaityn múlkiniń, kóliginiń bolýy, kiristeri jáne basqasy tekserildi. Barlyq aqparat, sondai-aq habarlamalar elektrondyq poshta jáne messendjerler arqyly jiberildi. AÁK kórsetýdiń jańa tetikteri sheńberinde tabysy az otbasylardaǵy balalardy qoldaýǵa erekshe kóńil bólinetinin, olarǵa kepildik berilgen áleýmettik toptama engizilgenin atap ótemiz» delingen habarlamada.
Kepildik berilgen áleýmettik toptama jas sanattary boiynsha 2 túrge bólinedi: 1-den 6 jasqa deiin jáne 6-dan 18 jasqa deiingi balalarǵa arnalǵan.
1 jastan 6 jasqa deiingi balalar úshin azyq-túlik jáne turmystyq himiia zattarynyń jiyntyǵy qarastyrylǵan. Azyq-túlik jiyntyǵyna túrli jarmalar, piýre, shyryndar, sút jáne t. b. kiredi. Turmystyq himiia jinaǵy tis pastasyn, balaǵa arnalǵan shetkany, kir jýatyn untaqty, sharýashylyq jáne iis sabyndy jáne t.b. qamtidy, ol toqsanyna 1 ret usynylady.
6 jastan 18 jasqa deiingi balalarǵa mektepte tegin tamaq beriledi, qoǵamdyq kólikte oqý ornyna deiin jeńildikpen jol júredi, mektep formasymen jáne mektep kerek-jaraqtarymen jylyna 1 ret qamtamasyz etiledi.
