Almaty oblysynyń Panfilov aýdanyndaǵy dala órtine bailanysty qylmystyq is qozǵaldy. Esterińizge sala keteiik, qyzyl jalyndy óshirip júrip úsh adam qaza tapqan bolatyn, dep habarlaidy QazAqparat.
«Keshe órttiń janynan úlken qazanshuńqyr qazylyp, Ósek ózeninen sý alynǵan bolatyn. Sol qazanshuńqyrdyń arqasynda órtti aýyzdyqtaý múmkin boldy. Búgingi tańda órttiń ary qarai jaiylý qaýpi joq. Qutqarýshylardyń sózinshe, órt aqyryndap túnge deiin ózi sónýi kerek. Osy oqiǵaǵa bailanysty Qylmystyq kodekstiń 292-baby 3-tarmaǵy boiynsha is qozǵaldy», - dedi Almaty oblysy ákiminiń baspasóz hatshysy Ǵalymurat Júkel.
Panfilov aýdany ákiminiń orynbasary Shýhrat Qurbanovtyń aitýynsha, órtenip jatqan jer Jarkent qalasynan 50 shaqyrym jerde taýly aimaqta ornalasqan. Ol mańǵa atpen, kólikpen jetý qiyn. Biraq memlekettik qyzmetker órttiń aýyl aimaqtaryna taralý qaýpi joq dep sendirdi. Esterińizge sala keteiik, 5 tamyz kúni Panfilov aýdanynda dala órtin óshiremin dep qaza tapqan úsh adamnyń ekeýi jerlendi. Búgin ormanshy bolyp jumys istegen 32 jastaǵy Erkinbek Ospanovty jaqyndary sońǵy saparǵa shyǵaryp saldy.
Buǵan deiin, órtten úsh adamnyń qaza taýyp, 7 adamnyń zardap shekkenin habarlaǵan bolatynbyz. Almaty oblysy ákiminiń baspasóz hatshysy Ǵalymurat Júkeldiń málimetinshe, marqum bolǵan úsh azamat memlekettik nagradaǵa usynylady.
Panfilov aýdanynda dala órtin óshirmek bolyp, jan tapsyrǵan Qanat Úsenbekov pen Erkinbek Ospanovtyń árqaisysynda bes baladan bolǵan.
