Áliia Ábsemetova áleýmettik qoldaýdy qoljetimdi etý maqsatynda kómekke muqtaj adamdardy halyqqa qyzmet kórsetý ortalyǵynda turaqty jáne ýaqytsha tirkeýge turǵyzý múmkindikterin qarastyrýdy usyndy, dep habarlaidy QazAqparat.
«Qazirgi kezde elimizde áleýmettik qamqorlyqqa muqtaj jandar memleketten tiisti áleýmettik kómek túrlerin alyp otyrǵany belgili.
Alaida, bul tusta qiyndyqtar týǵyzyp otyrǵan máseleler de bar.
«Áleýmettik-eńbek salasyndaǵy kórsetiletin memlekettik qyzmet standarttaryna» sáikes, keibir kómekter men járdemaqylardy alý úshin azamattardan turǵylyqty jeri boiynsha tirkelgeni týraly qujat talap etiledi. Mysaly, ataýly áleýmettik kómek alý úshin bir jerde tirkeýde 6 ai turý kerek. Áleýmettik kómekke muqtaj jandar negizinen jaǵdaiy tómen otbasy músheleri ekeni belgili. Olardyń kóbisiniń basynda úii joq, sáikesinshe belgili bir jerde uzaq merzimde tirkeýge turýǵa múmkindigi bolmaidy», - dedi Á. Ábsemetova Úkimet basshysynyń orynbasary Eraly Toǵjanovtyń atyna joldaǵan depýtattyq saýalynda.
Osy oraida úii joq bolǵandyqtan, tanystaryna, týystaryna, tipti bóten adamdarǵa júginip, ai saiyn aqsha tólep tirkelýge májbúr bolady.
«Olar óz úii bolmaǵandyqtan, turǵylyqty jerin de jii aýystyrady. Al, túrli sebeptermen olar tirkeýden shyǵyp, basqa mekenjai boiynsha tirkelgennen keiin, olar áleýmettik kómekten 6 aiǵa qaǵylady. Bul jaǵdai, onsyz da qinalyp otyrǵan kópbalaly analarǵa qosymsha aýyrtpalyq túsirýde. Al endi múgedektigi boiynsha memlekettik áleýmettik járdemaqy taǵaiyndaý úshin azamattarǵa turǵylyqty turatyn jeri boiynsha tirkelgeni týraly talaptar qoiylady. Ýaqytsha tirkeý áleýmettik járdemaqy taǵaiyndaýǵa jaramaidy. Eger muqtaj jandardyń jeke menshiginde úii bolmasa, turǵylyqty turatyn jeri joq bolsa, sonda bul azamattar áleýmettik kómekti qalai alady? Sol sebepti, baspanasy joq kópbalaly analar men múgedek balany tárbielep otyrǵan azamattar, múgedekter úshin jáne basqa da muqtaj jandar úshin qajettiligi boiynsha áleýmettik kómekti, járdemaqylardy qoljetimdi ári tiimdi etý maqsatynda, olardy Halyqqa qyzmet kórsetý ortalyǵynda turaqty jáne ýaqytsha tirkeýge turǵyzý múmkindikterin qarastyrýdy usynamyz», - dedi depýtat.
«Ekinshi másele, jetim jáne ata-anasynyń qamqorlyǵynsyz qalǵan balalardy baspanamen qamtýǵa qatysty. Qazirgi kúni olarǵa memleket tarapynan kezekke sáikes turǵyn úi turǵylyqty mekenjaiy boiynsha, iaǵni, tek ózi turatyn eldi mekennen beriledi. Al bir aýdanda kóbirek úi berilip jatsa, ekinshisinde tipti múldem berilmeýi múmkin. Óitkeni, oblystar arasynda jáne bir oblystyń ishindegi aýdandar arasynda respýblikalyq biýdjet qarjysy esebinen turǵyn úi salý men berý qarqyny ártúrli», - dedi ol.
Depýtattyń paiymynsha, jetim nemese ata-anasynyń qamqorlyǵynsyz qalǵan balalarǵa oblystyń kez kelgen aýdanynan, bolmasa elimizdiń basqa oblysynan turǵyn úidi tańdaý múmkindigin berýdi qarastyrý kerek.
«Ekinshiden, balalar úiinen tárbielenip shyqqan jasóspirimderdiń ańǵaldyǵyn, jaqyny joǵyn paidalanyp, alaiaqtar olardyń baspanasyn tartyp alǵan jaǵdailar da kezdesedi. Sol sebepti, jetim jasóspirimderge berilgen turǵyn úi alaiaqtyq jolmen qoldy bolyp ketpesi úshin, olarǵa berilgen sátten bastap 5 jylǵa deiin turǵyn úidi satýǵa shekteý qoiý qajet dep sanaimyz», - dedi Áliia Ábsemetova.
