Ortalyq qalalyq klinikalyq aýrýhananyń qabyldaý bólimshesiniń meńgerýshisi Dáýlet Chýkmanov qalada tártipsizdik ornaǵan kezde qalai jumys istegenderi týraly aityp berdi, dep habarlaidy QazAqparat.
«Patsientter 5 qańtarda óte kóp boldy. Bul kúni túrli jaraqattarmen emdeý mekemesine 191 adam júgindi. Olardyń basym bóligi bas jáne keýde kletkasynyń aýyr jaraqatyn alǵan. Biz barlyq patsientke barynsha kómek kórsettik. Aýrýhana qyzmetkerleri júkteminiń kóp ekenin túsinip bári jumysqa shyqty», - deidi ol.
Dárigerdiń sózinshe, patsientterdiń jartysy shuǵyl meditsinalyq kómek kórsetkennen keiin, ambýlatorlyq emdelýge jiberildi. Jaraqaty aýyrlar aýrýhanaǵa jatqyzyldy.
«Bul kúnderi 9 kezekshi brigada juyms istedi. Qyzmetkerler táýlik boiy aýrýhanada boldy. Kúnine 145 operatsiia jasaldy. Jasyratyny joq bizdiń boiymyzda úrei boldy, atystyń daýsy, agressiialy patsientter kelip jatty. Olar jalǵyz bolǵan joq. Olarmen ilesken adamdar boldy», - dedi dáriger.
Ortopediia bólimshesiniń meńgerýshisi Qanat Táýekelov bul kúnder óte aýyr bolǵanyn tilge tiek etti.
«Túrli synyqtarmen túsken patsientter boldy. Syrttai fiksatsiia, súiek synyǵyna Illizarov apparatyn saldyq. Óte aýyr boldy, kóptegen patsientter súiek tinderiniń úlken aqaýlyǵymen tipke jatpaityn zaqymdarmen tústi. Osy kúni demalysta bolǵan barlyq qyzmetkerlerdi jumysqa shaqyryp aldyq», - dep bólisti Qanat Táýekelov.
Búgnigi kúni emhana 24/7, iaǵni táýlik boiy jumysyn jalǵastyryp, Almaty qalasynyń turǵyndaryna shuǵyl josparly meditsinalyq kómek kórsetýde.
«Kópshilik tártipsizdikten zardap shekkenderdiń arasynda arýhananyń meditsina qyzmetkerleri joǵyna shúkir, aýrýhana ǵimaraty da zardap shekpedi»,- deidi ol.
