Jappai tártipsizdik kezinde qylmyskerler 18 jastaǵy qarýsyz sarbazdy kópirden laqtyryp jiberýge deiin barǵan. Bul týraly Ortalyq kommýnikatsiialar qyzmetinde QR Bas prokýratýrasy 1-qyzmet bastyǵynyń orynbasary Eldos Qilymjanov aitty, dep habarlaidy QazAqparat.
«Bas prokýratýra qańtar oqiǵasynyń sebepteri men mán-jailaryn anyqtaý boiynsha jumysty jalǵastyryp keledi. Kún saiyn qylmystyq qýdalaý organdary bolǵan oqiǵanyń jańa kórinisterin anyqtap jatyr. Búginde azamattar bastapqyda beibit mitingige barǵanyn, sodan keiin bul bastamany qylmystyq jáne destrýktivti kúshter ustap, qiratý men tártipsizdikterdi uiymdastyryp, memlekettik bilikti basyp alý maqsatynda lańkestik aktilerin jasaǵanyn kórip otyrmyz. Qylmyskerler memlekettik organdardyń nysandaryna arnaiy shabýyldar jasap, túrli aimaqtarda tártipsizdikke jol berdi. Osylaisha, olar qosymsha quqyq qorǵaý kúshteriniń kelýine jol bermeýge tyrysty. Oǵan Atyraý oblysyndaǵy jaǵdai mysal bola alady», - dedi Qilymjanov.
Onyń aitýynsha, syrttan qaýipsizdik kúshteriniń kelýi olardyń josparlaryna kedergi keltirýi múmkin dep qorqyp, qylmyskerler temirjoldardy jaýyp, úsh jolaýshy jáne bes júk poiyzynyń qozǵalysyn toqtatty.
«Ári qarai, olar politsiia men Ulttyq ulan sarbazdaryna shabýyl jasap, nysandardy qiratyp, órt shyǵardy. Mysaly, 18 jastaǵy qarýsyz merzimdi áskeri qyzmette júrgen sarbazdy ortalyq kópirden laqtyryp jiberýge deiin barǵan. Abyroi bolǵanda, ol tiri qaldy», - dedi Bas prokýratýra ókili.
