Qańtar oqiǵasyna qatysty tergelip jatqan istiń basym bóligi tonaý men urlyqqa qatysty. Bul týraly IIM tergeý departamentiniń bastyǵy Sanjar Ádilov aitty, dep habarlaidy QazAqparat.
«Lańkestik aktiler men jappai tártipsizdik sebepteri men olardy uiymdastyrǵan tulǵalardy anyqtaý boiynsha tergeýdi arnaýly prokýrorlar jetekshilik etetin vedomstvoaralyq jedel-tergeý toptary júzege asyrady. Óz kezeginde, ishki ister organdary jappai tártipsizdik aiasynda jasalǵan basqa da qylmystar boiynsha tergeýdi jalǵastyryp jatyr», - dedi ol ortalyq kommýnikatsiialar qyzmetindegi brifing barysynda.
Sanjar Ádilovtiń atap ótýinshe, qazirgi ýaqytta ishki ister organdary tergeýshileriniń is júrgizýinde 2 285 qylmystyq is bar.
«Onyń negizgi bóligi - urlyq pen tonaý. Bul - 1 674 is nemese jalpy tirkelgenderdiń jalpy sanynyń 73 paiyzyn quraidy», - dedi departament bastyǵy.
