Japoniia úkimeti Osaka, Hiogo jáne Miiagi prefektýralarynda infektsiianyń kúrt órshýine bailanysty koronavirýsqa qarsy qatań sharalar qoldaný týraly sheshim qabyldady, dep habarlaidy Kyodo News.
Sharalar, onyń ishinde jumys ýaqytyn qysqartý týraly uiǵarymdardy elemeitin qoǵamdyq tamaqtaný oryndaryna salynatyn aiyppuldar 5 sáýirden bastap bir ai ishinde kúshine enedi.
«Bul sharalar koronavirýstyń taralýyn toqtatý jáne taǵy bir tótenshe jaǵdai engizý qajettiligin boldyrmaý úshin qajet», - dep málimdedi premer-ministr Iosihide Sýga.
Osakada beisenbide indetke shaldyǵýdyń 616 jańa jaǵdaiy anyqtalýyna bailanysty el úkimeti osyndai sharalar qabyldaýǵa májbúr bolyp otyr. Bul – eki aidan astam ýaqyt ishindegi eń joǵary kórsetkish. Tipti Tokiodaǵy kórsetkishten de asyp tústi, munda 475 jaǵdai anyqtaldy. Al el astanasyndaǵy jazǵy Olimpiada oiyndaryna tórt aidan az ýaqyt qaldy.
Koronavirýs juqtyrý jaǵdailary Miiagide de ósýde. Munda sársenbide aýrý juqtyrýdyń 200 jańa jaǵdaiy tirkelgen. Hiogoda da aýrýǵa shaldyǵýshylar sany artyp jatyr, onda 211 jaǵdai anyqtaldy.
Meiramhanalar men barlar saǵat 20:00-ge deiin jabylady jáne ony saqtamaǵany úshin 200 000 ien (1800 dollar) aiyppul salynýy múmkin. Kontsertter men sporttyq oiyndar siiaqty iri is-sharalarǵa kelýshilerdiń sany 5000 adamnan aspaýy tiis.
